سوالف الخميس

هااااااا اخيرا وصلنا يوم الخميس ، و الإسبوع الياي اجازة ان شاء الله عموما الويكند بالنسبة لي احب ارتاح فيه و اطلع مع ج لأن هذا اليوم فري مالنا 

وايد حلو كأزواج تخلون لكم طلعة مميزة بينكم لكم انتو ،سواء كانت ريوق او عشا ، شخصيا افضل الريوق عشان ماكو زحمة و الأجواء هادية 

هالشي سمعته و شفته بين وايد ناس حولي و رفيجات ماشاءالله اللي علاقتهم الزوجية صحية  و متفاهمين سواء عندهم عيال او لأ 

و الأحلى طبعا انه هالطلعة مو اجبار من الزوجة انه لازم تطلع معاي و يطلع مغصوب 

لا بالعكس يكون اهو يحب يطلع معاها و الحمدالله هذا التفاهم و التوفيق من الله 

رجعت اكتب ترا عن هالمواضيع بس بشكل بسيط لأن اللي متابعيني قالوا لي لا تطلعين عن مواضيع الزواج وايد لأن هذا هدف البلوق مالج و هذا اللي كنه نقرا عنه 

بس انا مابي اكرر المواضيع و لا ابي اعيد نفس الكلام كل مره 

الحمدالله قناعاتي بالزواج و نظرتي له ما تغيرت يمكن كونت افكار يديدة بس ما تغيرت 

من البداية 

الصداقة و الإحترام بالنسبة لي من اهم العوامل 

و صار لي فترة احاول اسأل اللي حولي و الناس السعيدة بحياتها 

الكل عطاني نفس الإجابة 

و ترا سألت مختلف الأعمار  

طبعا مو شرط كلامي هذا 100%صح 

بس هذا اللي من الناس اللي حولي 

طبعا مو ضروري الكل يتقبل ، و كنت بالسابق انصح البنات اللي كانوا يشكون لي و اقولها عامليه كصديق بس للأسف وقفت هالشي و كل واحد و كيفه لأن البعض اهيا نفسها مو قادرة تتقبل نفسها الا "كزوجة"و بس 

من يومين اذا تعرفون 

MRMR

تكلمت بسناب بموضوع الأنوثة و رغم انه مرات انا معاها ما نتفق على اشياء معينة لكن كلامها عن جزء مهم بالزواج وايد عجبني لأن يمثلني و تكلمت بنفس الفكرة وايد 

انه المرأة اهيا اللي تسمح حق الريال انه يهينها و يحسسها انها اقل منه و ماله راي و لا كلمة 

و لا تقول هذا اللي كاتبة لي ، الله سبحانه و تعالى ما خلقنا عشان يعذبنا 

هذا كلام مرمر 

و انا معاها بهالشي ، ووايد زوجات مقتنعين بهالشي الحمدالله احنا مو عايشين بأيام الجاهلية او العصر الحجري 

الله سبحانه و تعالى خلقنا و احنا عندنا حرية الإختيار والراي 

ليش نرضى بالذل ؟؟ و نقول بعد هذا نصيبي 

طبعا في وايد بنات عندها  هذي الحياة الصح ، و هذا الزواج 

اوكي اذا مقتنعة هذا شي راجع لج بس لا تحبطين غيرج !!!!اذا انتي مو راضية تتغيرين و لا تحبين نفسج غيرج يقدر 

وايد نماذج حولنا تحرروا من هالعقدة ووصلوا  لي حب نفسهم و ذاتهم و سعادتهم و عاشوا حياة سعيدة 

اما اذا كان الرجل مو راضي يتقبل هالشي و لا يبي هالشي و معيشج باحباط ، لو ترجعين بالماضي اللي كان عايش فيه اكيد فيه عقد نفسية 

مو مشكله كلنا عايشين بمشاكل و مرت علينا مشاكل بس الواحد يتطور و يتعلم و يغير من نفسه 

ج كان دايما يقولي ماكو شي اسمه "بعد هذا طبعي و ما اقدر اغيره "لا الإنسان يتغير للأحسن 

انتي انسانة و لج كيانج و كرامتج لا ترضين بالذل لا ترضين و لا تسمحين لأي شخص يخليج تنامين مو مرتاحة او تعيشين خايفة طول الوقت 

و تعتقدين هذا حب !!للأسف 

يسب اهلها ، يسب ابوها ،و تسكت 

في وحده يسولفون عنها رفيجاتي من فترة انه كان طول فترة زواجها يقول لها زين مني اني تزوجتج و اهلج مو مستواي لين اقتنعت بالفكرة و قامت تستحي من اهلها مسكينة 

و عاد الأدهى و الأمر مليون خيانة و تشوف بعينها 

و تسكت و تسكت و تسكت 

احترم اللي اذا درت بالخيانة تاخذ القرار باحترام نفسها و ما ترضى و لا تسكت 

و لا تقول كل الريايل جذي 

او يقص عليها بعذر 

المسحور 

ترا يديد هالعذر هههه 

المهم هذا البوست كان من بعد وايد حوارات مع وايد بنات حولي 

الحمدالله 70%من بناتنا يحبون نفسهم و عايشين عيشة سعيدة مع ازواجهم 

الباجي الله يكون بعونهم يا رب 

المهم اليوم خميس استانسوا 

طلعوا الفير روحوا تريقوا في برايم اند توست لأنه الوحيد فاتح 

غيروا 

و الله يوفق الجميع