معرض العطور و دعايات فتيات السوشال ميديا

انا كلش ما اروح معرض العطور ، ولا حتى امي فاعتقد اني تعلمت هالشي منها ، لأن لا يمكن اقدر اركز بكل هالروايح بالمعرض صج صج تقلب جبدي 

و بعدين انا طريقتي بالعطور غير شوي عن البنات  ، استخدم عطر واحد فترة معينة و اذا خلص اشتري عطر ثاني ، و الله احس كل ريحة ترتبط بفترة و احداث معينة بحياتي 

المهم كنا طالعين انا و امي و رفيجاتها و قالوا رفيجاتها انه راح يمرون المعرض فرحنا معاهم ، جان اقول فرصة اروح اشتري عطر للشعر ما بقى وحده من البنات المشاهير ما مدحته 

ارجع و اقول الناس اذواق 

العطر ما يسوى الخبه اللي سووها كلش ، و الصراحة اكو ماركات ثانية وايد احلى 

ودي بس اعرف اهما صج عاجبهم و يستخدمونه و لا بس عشان الدعاية ؟؟ و انه مدفوع لهم ؟؟؟ 

للأسف صاروا بالضبط نفس الدعايات اللي نشوفها بالتلفزيون كلنا ندري انها دعايات و بس 

مبدأ المصداقية بالسوشال ميديا لي شخصيا احسه اختفى 

يمكن وايد ناس بيقولون لي و اذا اندفع لج نفس المبلغ ؟؟ 

لا طبعا 

انا عندي مبدأ و نا راح اغيره و ادري اصحاب المبادئ ما يمشي سوقهم 

بس مو مهم عندي قناعة و ماشية عليها 

البعض ينتقدني وايد على هلإسلوب بس شخصيا انا راح اكون مرتاحة 

و الله احس لو يندفع لي مبلغ على شي انا مو مقتنعة فيه و الله راح احاتي اكثر 

خلنا من موضوع  العطر 

وايد منتجات و مطاعم و عيادات قاعدين يسوون لها دعايات بمبالغ مادية فما ندري شنو الصح و شنو الغلط