صباح الخير
رجعت بقوة للقراءة ، سواء بالعربي او بالإنجليزي ، لكني شعرت بشوق لقراءة كتب عربية من يوم كنت بالقاهرة
قلت لكم " للقاهرة سحر " .و بغض النظر عن نوعية الكتب ، الهدوء و تخصيص ساعة يوميا اقرأ فيها كلمات وايد تغير حياتي
انا من يوم كنت صغيرة فيني نهم للقراءة و بعدين الإنترنت و التليفونات شغلتني لكن كنت دايما اشتري كتب و احرص وايد ان اقرأة بلإجازات لما اكون مسافرة
ج اصلا عرفني و خصوصا بسفراتنا اللي تكون بمنتجع
ضروري يكون عندي و قام اهو يسألني اذا شريت كتب بالسفرة او لا ، لأن يشوفوني شلون كنت اقرا الكتب بسرعة
القراءة
تخلي احلامنا بالنوم مختلفة ، او انا احلامي تختلف ، فجأة احس خيالي و عقلي الباطن يشتغل و اتوقع هذا الشي اللي مخليني ارجع اكتب بالبلوق بغض النظر شنو نوعية المواضيع
اللي ودهم يرجعون ، خلوها عادة يومية قبل النوم ، ادري التليفون ما يخلينا نرتاح ، و انا من الناس اللي احب اجابل تليفوني لكن جربوا بالتدريج بعد ما تفرشون اسنانكم و تدخلون فراشكم
و على فكرة انا ما عندي تلفزيون بغرفة النوم و هالشي مساعدني بوايد جوانب في حياتي و تكلمت من قبل
و بعد انا قاعدة احاول اخفف اكل بالعشا فكنت اقول اذا بقعد بتعشى عشا ثقيل ما راح يمديني اقرا
فبسرعة ادخل فراشي و احط يمي شوي توت و اكل و اقرا
و صج قاعدة احس بمتعة الله يتممها علي
يمكن تسألون وين ج ؟؟؟
انا من الناس اللي عادي عندي لو يروح الدوانية كل يوم ، على موعد ردته اكون خلصت فقرة القراءة وبعدها اقعد معاه نسولف و انا مرتاحة و ريلاكس
اي وحده عندها مشكلة برجوع زوجها متاخر خل تشغل نفسها
و الكتاب شي حلو تشغلين نفسج فيه
على فكرة انا ما اقدر اتحمل الكتب الثقيلة ، بروحه الدنيا و مشاغلها تتعبنا فأحب اقرا شي بسيط ، هادي و حلو
------------------------------------------------------------------------------------------------------------------
خارج الموضوع :
تقول لي ، لا تفرضين علينا اسلوب حياة ، حياتج انتي هادية اما حياتنا احنا في مشاغل انتي ما تعرفينها
ارد و اقول
الحمدالله :)))
No comments:
Post a Comment