خوف ، و ثقة و حب ؟!؟!؟

اللي صاير فيني مو طبيعي ، وايد وايد احاتي و قمت اخاف وايد مادري ليش ، بس افكر و هالشي غلط اكيد 

المهم خل اقول لكم شالفة صارت لي من جم يوم ، ج رايح البر بالسعودية و اهو حده مستانس عشان جذي ما تكلمت لأنه وايد طول علي تقريبا صار له اسبوع و انا بعد راح اخليه تقريبا اسبوعين بسافر مع اهلي انشاءالله :( بس شسوي مادري شلون ما فكرت و ابوي مسكين حده مستانس بسافر معاه 

اوكي ادري بالبر بالسعودية مو دايما اكو سيرفس بس لا يمكن يطول علي و ما يدز لي واتساب  ، عاد يوم الجمعة على حسب ما اذكر الساعة اربع العصر قالي شوفي انستغرام ، شفته حاط صورة مع ربعه و بس علقت عليه و كلمته واتساب 

المهم انا طلعت بعدين ساعتين دزيت له ما رد ، بعدها بساعتين بعد ماكو رد و ما شاف اصلا الواتساب 

و بس هذي حالتي مجابلة التليفون و ماكو اي خبر ما نمت كلش مواصلة و ظليت مواصلة 

كنت اتمنى انام اضيع الوقت بس ماكو فايدة و ظليت طول اليوم مستعسرة 

اللي ضايقني 

ليش هلأفكار اللي يت فبالي  من متى انا جذي ؟؟؟؟ 

يمكن لأني تعودت عليه انه حريص لازم يكلمني بس ما كلمني المهم تعبت تعبت 

و طافت 24 ساعة انا ينيت مادري شسوي 

رفيجاتي دروا ووحده فيهم قالت لي كلمي احد من ربعه 

ج ما يحب هالشي و انا اصلا ماكو علاقة مع اي احد من ربعه الا واحد بعد ما اعرفه عدل 

بس خلاص وصلت حدي و كلمت رفيجه و قلت له يطمني اذا يعرف اي احد من الشباب اللي معاه 

ما احب هالحركة لأني ما احب احد يقول اي طالع زوجته تدوره من مكان لي مكان بس ما قدرت و الله 

اسألكم لو انتو مكاني شنو تسوون ؟؟ 

و مابي اخرع احد من الأهل بس صج توهق 

المهم بس كلمت رفيجه 

و لا يدق علي سبحان الله قبل لا يكلمه رفيجه 

سمعت صوته و بجيت !!!انا ما كنت جذي حساسة بس مادري ليش

اتوقع مع الوقت العلاقة مع الشخص الثاني تتغير اذا مريتوا بمواقف و شفتوا شلون وقف معاكم او رده فعله او المعاملة الزينة 

هالشي يخلي الوحده تتعلق اكثر و تثق اكثر 

وايد مجتمعنا سلبي ووايد الأفكار لوعة على العلاقات و الحب 

كله  يخلونا ما نثق و نخاف و نكون حذرين 

و ما انكر صح هالشي 

بس احس قاعدين نضيع عمرنا و احنا خايفين و نختبر الأشخاص  و المشكلة نظرتنا على الأشخاص اللي يحبون بعض بس يعيبون عليهم الناس للأسف 

وايد تكلمت عن هالسالفة ادري 

بس هذا اللي اسمعه و اقراه و اشوف الناس يقولونه 

الحذر زين بس 

الثقة و الحب احلى