شرايكم ؟؟؟

ذاك اليوم قاعدة افكر و اقول يا ربي ليش ما كو شي فبالي اكتب عنه بالبلوق ؟؟ جان استوعب انه اول انا كنت كل شي افكر فيه او اي موضوع يطري على بالي بنفس اللحظة اكتبه 

عاد الحين في موضوع فبالي و قلت لا لا مابي انساه و ازم اكتب عنه 

المشكلة بدوامي اليديد شوي ماكو خصوصية بالمكاتب فمو قادرة اركز الا لما احط السماعات 

المهم مو هذا موضوعي ، 

طبعا من عمر الدنيا نسمع انه وايد زوجات تعيش و تكمل حياتها مع ريال اهيا مو سعيدة معاه و تقول خلاص بعد هذا نصيبي و عشان عيالي و عيالي اكبار و عشان العشرة 

هالفترة تغيرت  النظرة حق هالموضوع و قامت المرا تحس انها ما تبي تضييع حياتها ، طبعا انا ما اتكلم على الزوجات اللي يبون اي سالفة عشان يطلقون ، اتكلم على الناس اللي ضحت ضحت و ما تبي عمرها يضيع اكثر على شخص ما يسوى و لا قاعد يضحي بالمقابل 

و بعد لي الحين في بنات يتحملون عشان العيال و مثل ما قلت انهم يتقبلون الواقع 

بس هل ممكن ريال انه يفكر جذي ؟؟ و فيه ترى انا مستعد انه يعيش مع انسانة مو مرتاح معاها عشان بس العيال ؟؟ هممممم مسكين و الله يعطيه العافية على التضحية بس مادري احس العمر اعيشه مرة وحده ما اقدر اضيعه ؟؟؟ 

ترى انا مو قاعده احكم و لا اعطي حلول بس قاعدة افكر ، يا رب ان شالله ما انحط بموقف جذي 

بس صعبة الحياة جذي 

يمكن انا لأن يهمني الجانب العاطفي بحياتي و يهمني اني اكون مرتاحة فيه اكثر من اي جانب ثاني عشان جذي ما اتخيل هذا النوع من التضحية ما اقدر اعيش مع شخص ما احبه كلش 

عشان بس العشرة او اني تعودت عليه 

لازم في حب و حب قوي بعد 

شرايكم ؟؟