الموضوع الأزلي اللي مو راضي يخلص و لا ينشال من بالي
فتحت الراديو و لا على برنامج اسامة فودا مال المشاكل ، يقمت يقمت بس ماقدرت افره
كانت اللي داقه وحده تقول مشكلتها بدت انها اول ما تزوجت طلعت مع زوجها عشا و هناك بالمطعم لقى ربعه و من بعدها قالها ماكو مطاعم و لا طلعات و لا تروحين مكان و ماكو دراسة ووظيفة و لا رفيجات و لا شي
انا طبعا هذا النوع من الريايل يقتلوني وودي احطهم و اذبحهم واحد واحد
اسامة رد عليها و قال
هذا زوجج و انتي لازم تطيعينه اذا انتي حابه هالشي
ردت البنات و قالت انا مو حابه هالشي بس انا طعته لأني انا زينة و مشيت معاها بس للأسف ما لقيت مقابل
وااي وااي عصبت يومها عصبية و استعسرت
ودي اقولها و لا راح تلقين مقابل
راح تنصدمين بوايد اشياء
و لحد يقص عليج و يقولج تغير
لأن في ناس فوق العشر سنين و لا تغيروا !!!
احلى سنين حياتج و شباباج راح تروح و انتي عايشة على امل انه يتغير ؟؟
و انتي وين حياتج و كيانج ؟؟
في بنات احسهم اهما راضين و ما يبون يتغيرون
و هذيل مساكين
البنت اللي داقه مبين عليها انها شخصيتها قوية و تبي تغير
للأسف مجتمعنا يعتقدون انه لما اقول حق وحده لا تسكتين على هالشي
اني قاعدة اشيشها و اخرب بيتها
الله يعينهم اللي عايشين جذي لأن اي صدمة ممكن تقتلهم و الله
الريال اللي يفكر جذي ودي ادخل بمخه و اعرف شلون يفكر ؟؟؟؟؟؟؟؟
شنو الأسباب ؟؟ اللي جذي معقد و شخصيته ضعيفة لأنه خواف
بس مسكين عباله انه قوي
المهم مشكلة البنية ضايقتني و ايد
هذا العذاب النفسي متعب اكثر من العذاب الجسدي و الله لما انسان يحس انه ما عنده تحكم بحياته ما عنده قدرة انه ياخذ قرار شلون يقدر يعيش ؟؟؟؟
للأسف في بنات مخهم مغسول و قايلين لهم انه هذا اهو الزواج
لا حبيبتي لحد يقص عليج
الزواج سعادة و راحة و حب و استقرار
بس بعدين
قلت الحمدالله
رسالة :
جابك الله لي هدية من السما
3 comments:
و الله يا مروة كلامج صح .... الانسان يعيش مرة وحدة. .و ما له داعي أن تضيع عمرها مع واحد مريض علي أساس أن زوجها...ما صارت طاعةعمياء. ..الاحترام مطلوب بس االأهم أن يكون لها رأي الطاعة بحدود الاحترام مو انها تكون مسلوبة الإرادة
أنا اشوف هالتفكير خطأ بس إنتي بس قاعدة تشوفين المشكلة من ناحية وحدة،، يعني لو انا الزوج و قاعد أدفع النفقة كاملة فلي الحق الشرعي و القانون اني امنعها من هالاشياء،، و إذا بتقولين مجتمعنا متخلف اتفق معاج بس ترا مجتمعات بره الرجل ما يدفع النفقة و ما عنده السلطة على المرأة،، إذا تبين الرياييل يتنازلون عن هالاطباع لازم تخلين الحريم بعد يتنازلون،، هذي مجرد وجهة نظر سواءا اعجبتج او لأ بس حبيت أقولها و شكرا
كلامك و موتضيعك حلوه .. لس انا عندي مشكله ان في كلام بحكم اختلتف اللهجات مش فاهماه .. الفكره عجبتني عموما و حابه استفاد منها
Post a Comment