امس في برناج القايلة كان موضوعهم عن الزوج السعيد والزوجة السعيدة ، حسافة ما سمعته لأني بالدوام و عندي لوية و لما طلعت لحقت على اخر شي
انا دايما اقول اني مو متخصصة و لا عندي شهادة في هذا المجال و انا اتكلم عن تجربتي اللي يمكن تفيد ناس و ما تفيد ناس
الحمدالله يا رب تجربتي جميلة بالزواج و على فكرة انه نوصل للساعدة بالزواج شي مو سهل
كتبت و قلت في وايد مواضيع كتبتهم قبل انه اول السنين اهيا التعب و فيها تقدرون توصلون حق سعادتكم
بالنسبة لي شخصيا
الصراحة
انكم تكونون صريحين مع بعض و ما تمثلون و لا تعيشون دور راسمه لكم المجتمع مو انتوا راسمينه حق نفسكم ، مواضيع و سوالف قعدات البنات و الحريم انه الريال يحب جذي و الريال ما يحب و الكل لازم يطبق ما تمشي عندي
خلج طبيعية و عيشي حياتج بدون تمثيل راح ترتاحين و تعيشين بسعادة
ما نسوي شي من ورا بعض ، هذا من اهم الشروط اللي حطيناها بينا ، حتى لو شي غلط صار لازم نقول حق بعض
من الأشياء المهمة ، القيل و القال
لا تسمعون كلام الناس حده هالشي يغث و يضايق و يخرب عليكم ، الناس بيتكلمون سواء انتو صح او غلط
اصلا الريال قام ينحرج انه يقول انه مرتاح بزواجه لأن مثلا الجو العام انه لازم يتحلطم على زوجته بس اللي صج "ريال"ما ينجرف مع هالكلام ببالعكس يفتخر و ما ينحرج انه يعبر عن حبه
و حتى مجتمع البنات ، دايما يقولون اذا شافوا اثنين مع بعض مرتاحين و ماسكين ايد بعض
على طول بروحهم يقولون انه اكيد عندهم مشاكل بالبيت
و الله عندي مشكلة بالبيت ما اقدر امثل الصراحة اني مستانسة !!!!شنو هالقدرة
وايد طلع علي كلام انا شخصيا اني امثل هههههههه الحمدالله عاد انا كلشي كنت اكتبه بالبلوق الهوشات و الأشياء الحلوة
بالنسبة لي من اسباب سعادتي انه ج رفيجي و صديقي مو بس زوجي
صح عندي وايد رفيجات بس
Best Friend
اهو ج
انا ضد فكرة انه الريال لا تقولين كل شي
يمكن صح بعض الريايل تصلح معاهم هالسالفة
بس انا لا
علاقتنا كأصدقاء الحمدالله اهي العامل الرئيسي انه احنا مستانسين
الحب شي مهم ، لي الحين عايشة الحب اللي لما نشوف بعض استانس وايد الحمدالله
الله يتمم يا رب و يسعد كل زوجين
و حق الناس اللي كله منكدين على غيرهم
الله يخليكم مو كل الناس ترى نفسكم
اللي يبي السعادة يعيشها و يحصلها سواء كان متزوج او منفصل او مو متزوج
الله يخلينا حق بعض و يحفضنا
اهداء
No comments:
Post a Comment