تعرفون الكلام الوايد اللي يدور بالمخ و يشغل بالكم مو شرط انه يكون يضايق بس وايد افكار تكون بالبال ،هالكلام اللي كنت اول ما بديت البلوق على طول اكتبه هني و كنت ارتاح و استانس لما ارجع اقراه بعد جم سنة .
وايد كتبت عن هالموضوع من قبل بس مو بالعربي مادري ليش ما كانت عندي الجرأة اني اكتبه بالعربي لأن في ناس معينين ما كنت ابيهم يقرون همممم يمكن او لأن بمجتمعي و حولي محد يتكلم عن الموضوع بنفس الطريقة اللي افكر فيها
أغلبكم يدري اني متزوجة و الحمدالله من 7 سنوات و الحمدالله على كل الحال انه الله سبحانه و تعالى كتب انه ما يكون عندي اطفال
تجربتي كاملة موجودة بالبلوق بوايد مواضيع ، فترات كنت ضعيفة و فترات كان فيني غضب كبير و فترات بديت استوعب الموضوع لين وصلت المرحلة اللي انا فيها الحين
اعتقد انه وايد ناس حولي افهموا الرسالة اني ابدا ما اتضايق من موضوع الأطفال و الحمل
كانوا في اشخاص يتحسسون انهم يتكلمون بهالمواضيع يخافون اني اتضايق و انا هذا الشي اللي يضايقني لأني و لله الحمد وصلت مرحلة من القناعة انه بالعكس ما اتضايق وايد افرح و الموضوع يمر علي عادي
ما انكر اني وصلت لي هالوضع و هالشي تقريبا وصلت لها صارلي 4 سنين ،ما انكر انه الطريج مو سهل ، و السبب ترى مجتمعنا
بره الكويت لما اسولف مع اشخاص اجانب لما اكون مسافرة و يسالوني جم سنة متزوجة و اذا عندي عيال ، دايما ردهم
استمتعي بحياتج
استمتعي بالموجود عندج
و انه دايما خطة الله افضل وايد من تخطيطنا احنا البشر
الردود هذي لوشنو ما القاها عندنا
دايما
ما عالجتي ؟؟
الريال راح يمل ترى ديري بالج
شلون زوجج ساكت ؟؟؟ ترى بيسكت فترة بس بعدين ما راح يقدر
لاحظتوا الفرق ؟؟؟ لاحظتوا احنا المسلمين شلون تفكيرنا ؟؟؟ أي ترى انا كنت جذي و كنت اقول حق ج يمكن تفكر تتزوج لأن يمكن الله مو كاتب لي معاك ذرية فاذا ناي قولي من البداية عشان كل واحد يشوف طريجه
الحمدالله الحمدالله انه الله رزقني انسان يحبني لشخصي و تزوجني عشان اكون حبيبته مو بس زوجته ام العيال
و هذا نمط الحياة اللي انا احلم فيه من يوم كنت بنت صغيرة
غير الإيميلات اللي توصلني من وايد ناس ادري انهم يبون الخير يعطوني اسماء دكاترة و علاجات و انا صج صج ما ابي
اكيد سعيت لفترة معينة بس سبحان الله لما الشي ما يصير من الله
اقتنعت انه اللي ما منع هالشي الا معوضني بشي غيره خير
شلون قدرت اوصل للراحة النفسية اللي انا فيها الحين
اول شي قررت من داخلي انه هالشي رزق من الله سبحانه و تعالى و ما راح اييني الا اذا الله كتب لي هالشي
رضيت باللي الله كاتبة لي
وجود ج بحياتي شي مهم لأن واقف معاي و عمره ما حسسني انه في شي ناقص بحياتي
القناعة و اني توكلت على الله
و دعيت الله سبحانه و تعالى انه يخليني قوية و ا اهتم لكلام بعض الناس اللي مساكين يكونون يبون لي الخير بس ما يعرفون يوصلون المعلومة و ما يعرفون معنى "مالكم شغل"لأن هالموضوع شخصي
وايد يعتقدون اني ابالغ او امثل
مو مهم شنو يعتقدون المهم انا شلون عايشة و انا شلون مرتاحة
الحمدالله ما احس بنقص بحياتي و على فكرة هالشي مو مني انا ، هالشي نعمة من الله سبحانه و تعالى ، كنت ادعي انه يا رب ترزقني الرضى و راحة البال
هالشي اهم من كل شي ثاني
و ادري انه لي الحين في ناس راح ايوني و يقولون لي
" ترى ما يصير تظلين جذي "
ههههههههه عاد الصراحة ما راح اقدر ارد عليهم
على فكرة
كلنا ماخذين رزقنا كامل بس كل واحد فينا ماخذه بجانب معين اكثر من الثاني
فلا تحسون ابدا انه الله حارمكم من شي
شوفوا النعم اللي عندكم و راح تدرون انه في شي عندكم مو عند غيركم
5 comments:
الحمدالله كلامك 100 من 100 صح و انا تزوجت معاك و من متابعينك من اول يوم . الله يوفقك و يكتب لك كل خير
الله يوفقك اختي ويسهل لك كل صعب..وتأكدي دايم ان الرضا نعمه من الله..وكثير محرومين من هالنعمه وتعبانين بحياتهم..
Beautiful♡ god bless u
انا امر بنفس المشكله ما عندنا عيال مو لان فينا شي بس الله ما رزقنا لحد الحين ...ووايد ناس تحاول تخليني افكر ان حياتي مو مستقره وان لازم انفصل قبل ما اكبر ....انا احب ريلي وايد واهوا يحبني ..وموقادرين يستوعبون ان احنا مالنا دخل اب شي وهل الشي طالع من ايدنا ....التدبير عند رب العالمين ومالنا الا الدعاء
Anon1 : تسلمين حبيبتي
علي العتيق : شكرا اخوي صح كلامك ، انا كنت ادعي ربي انه يرزقني الرضا على اللي راح يكتبه لي
Anon2 : thanks :)
Anon 3 : هذي المشكله اللي مو قادرين يستوعبونها
اذا انا احب زوجي و اهو يحبني ليش انفصل ؟؟
Post a Comment