Monday, April 14, 2014

A Life After Marriage : ندري دعله .... بس تستاهل







امس كنت بايكيا ، لما وصلت صوب اغراض المطابخ صار جدامي موقف ، قعدت شوي افكر فيه ، الزوجة قالت حق زوجها : وااااااي متى يصير عندي مطبخ و ارتاح 

چان يرد عليها : عندج مطبخ امي 

ردت : اقولك ابي يصير عندي مطبخ بروحي ، مابي مطبخ أمك ؟؟؟ 


وبس صرت بعيدة عليهم 

منو الصح و منو الغلط ؟؟؟ 


راح اقول وجهة نظري و انتوا عطوني رايكم 

كعادتنا احنا البنات نحن نبي نطلع ، و اذا ما طلع معانا نعصب و انت ما تطلع و انت ما تبيني و انا تستحي تطلع معاي . انزين بس اذا طلع !!!!!! ليش تصيرين دعلة و تضايقينه ؟؟ و تقطين كلام ماله داعي الحين ؟؟ 


ترى مو قاعدة انتقد البنية لان انا مرات اسو جذي 


و رد زوجها الصراحة يحر !!!!! شنو عندج مطبخ امي ؟ البنية ما فتحت الموضوع عشان تقولها هالكلام ؟؟؟؟ اكثر شي يضايق الوحدة لما تقوله مثلا ابي هالشغلة الفلانية يرد يقول اييب لج اللي عند امي !!! او مثل الاخ عندج مطبخ امي !!! 

انا ما طلبت الشي الا ابيه حقي ! 


شنو اللي خلاها تتكلم ؟؟ و يكون هالشي بخاطرها ؟ 

أغلبنا يطلبون منا اهلنا انه ما نطلب شي وقت الزواج و خصوصا اذا بنسكن عند اهل الزوج 

عندهم فكره انه عيب و ماله داعي ، مع اني شخصيا اعتقد انه غلط لانه راح تظل الوحده تتحسف و تقول ليش ما سويت هالشي ، و ليش ما حطيت هالاثاث و ليش وليش 


انا حسيت فيها لما حماي تزوج انه مشالله زوجته طلبت وايد تغيرات و هالشي من حقها طبعا ، عشان جذي من البداية خل تطلب اللي تبيه و يريحيها وتكون واضحه 


أكون صريحة معاكم ، طالما البنت بخاطرها هالشي حاول انك تسويه اذا تقدر و اذا ما تقدر اشرح لها ظروفك راح تتفهم و يمكن تساعدك بعد لان والله ما راح تسكت عنك انا ادري ههههه 

و بالاخير ، هالاشياء كلها تروح و ما يبقى الا انتوا الاثنين فلا تخربون لحظات حلوة تقضونها مع بعض 

تذكروا انتوا مو عايشين مع بعض الا لأنكم تحبون بعض

1 comment:

Hanan Abu Jamea said...

والله ضحكني الموقف لانه يصير معاي بالظبط
انا بما انه صار هالموقف معاي بوضحلج مرات اكون صج متحسره اشوف اشياء وودي فيها وودي بمكان بروحي ومطبخ بروحي ريلي عنده اسبابه عشان نظل فبيت اهله بس انا احس انه نقدر نتغلب على هالاسباب بس اهوا ما يبي لانه مرتاح جذي ولما اقول هالشي وقت الطلعه او غيره لانه ودي يحس شوي انه صج خاطري اطلع بشقه بروحي
وموضوع انه تطلب التغييرات اللي تبيها انا معاج لانه انا باول زواجي ماطلبت تقديرا لظروف زوجي )طالب( والحين حتى لو طلبت اغير شي يقعد يأجل