Sunday, January 26, 2014

مجتمع الكلام و القيل و القال



خلال الفترة اللي طافت ، وايد مرت علي و سمعت مواقف و كلام من ناس حولي ، الكل يشتكي من شغله وايد تضايق صايرة بين الناس ، هالشي موجود من زمان و اهو انه الناس اللي تقعد معاهم و معتبرهم اقرب الناس لك اهما اكثر ناس مبدعين فيك من وراك ، يتكلمون عن طبيعة حياتك و عن شكلك و ينتقدون ادق التفاصيل و ما يفرحون لك اذا نجحت 


انا كان اسلوبي اني اقول حق اللي جدامي انه هالشي مثلا غلط و ليش ما تسوين جذي و ليش ما تتكلمين و خاصة في موضوع بعض البنات على علاقتهم لإزواجهم ، و بالمناسبة ، ما ايي مني و الطريج اتكلم ، اهيا تفتح الموضوع او تسالني على شي بحياتي و ارد عليها 

للأسف كل هذا رد علي بطريقة مو زينة ، و منها قررت انه الناس اللي اهما "قراب"ما اعطيهم رايي و لا انصح و لا اتكلم معاهم بمواضيع خاصة 



المشكلة من القراب طلعت صح ؟؟؟ 


شلون ؟؟ و شنسوي ؟؟

ما عندي حل الصراحة ، يمكن اريح حل انه الواحد يوخر عنهم 
بس ما يصير اني اعيش بعزلة ؟؟

مستغربة الصراحة من اللي قاعد يصير 

و في شغلة 

انستغرام بين لنا انه في اساليب حياة مختلفة بالكويت 

مثلا في بنات عندهم اصدقاء و زملاء شباب ، مو من حقنا انه نتكلم عنها و نقول انه هالبنية موزينة ، و خصوصا اذا حاطة الصور بانستغرام و اهلها شايفين هالشي 
اهيا طبيعة حياتها جذي و بالعكس انا هذي احترمها اكثر من اللي جدام الناس مسويه فلم و انها متحجبة و من ورا اهلها تروح تقط لي حجابها 

ترى الحجاب حطيته مثال و ممكن انه يكون في اكثر من مثال 

و بخصوص مثلا تصوير العرس اللي انتشر ، المختلط ، انا و ج كنا نتكلم و قال انه هالشي موجود من زمان بس مو الكل يدري لأنه ما كان في وسائل تنشر هالشي 

مو قاعدة اتكلم انه الموضوع صح او غلط ، انا فكرتي انه الناس لا تقعد تتكلم على شي واضح ما يحتاج انتقاد 

مادري من وين المشكلة 
الناس و لا المجتمع اللي تربى على الإستهزاء 

ما اقول اني ملاك ، انا انجرفت معاهم في فترة من الفترات بس استوعبت انه هالشي غلط 


احب الناس الواضحين 
مهما كان توجهم سواء اتفق معاه او لا 

زميلة معاي بالدوام متدينة وااايد ، عندها قناعة انها ما تحتفل بالعيد بالوطني  سواء انا اتفق معاها او لأ بس احترمها لأنها انسانة واضحة و صريحة و قوية ما تنازلت عن قناعاتها  و بلغت المديرة على اعتراضها 
مادري شنو الإجراء اللي صار بس عجبتني 


حاليا بالدوام شوي قاعدين نعيش مرحلة نفاق على موضوع معين الكل متفق عليه 
المفروض يا انه نواجه الشخص او نسكت 


هممممم مادري ماني قادرة اقرر بس اتوقع 

اني راح اسكت 

شرايكم ؟؟ مرت عليكم مواقف من ناس قراب ؟؟ انصدمتوا ؟؟ و شلون حليتوا الموضوع ؟؟ 


2 comments:

Noorelhayat Maskeen said...

من زمان و هو المجتمع العربي شاد حيله في الحش!
الله يعينا
انا وصلت لإقناعه انه دام اللي أسويه مرضي ضميري و ديني و نفسي،. ف طز بالناس رضيت ولا انرضت
المجتمع صاير dual يعني
الناس صارت وجهين وجه ترضي فيه الناس و وجه ترضي فيه نفسها
اذا الواحد راضي نفسه و ضميره مرتاح مو لازم الناس ترتاح

ابن السور الكويت said...

الله سبحانه وتعالى عندما خلقنا وضع بنا انتماء لجنسنا فنحن جنس اجتماعي بطبعه .. ولا يمكن لا احد منا ان يعيش لوحده .. وان فعل .. فان هناك الكثير من المشاعر والاحاسيس والتفاعلات التي قد تدفعه للعودة ثانية ... لكن .. مع وجود متغيرات دائمة في طبائع البشر والتي غالبا تكون مكتسبة فان وجود بعض المنغصات قد تكدر صو اللقاءات ولغة المحبة ... علينا ان نفهم ان هناك نسب في فهم الاخر .. فان كنا نحبه علينا ان نقبل بالنسبة التي يمتلكها .. فقد يكون رائعا في جانب وغير ناجح في جوانب اخرى ... علينا ان نأخذ الجانب المشرق بشخصيته وندع الجوانب المظلمة ...