شهر العسل : شنو اللي يصير صج بشهر العسل A Life After Marriage post

ملاحظة : الصور من بعض سفراتنا المختلفة ،كل سفرة بالنسبة لي اهيا شهر عسل 

شهر العسل ، السفرة الأولى لكم و بروحكم ، اول مره الزوج راح يحس انه مسافر و في معاه امانة لازم يدير باله عليها ، و اول مرة العروسة تسافر مع شخص بروحها  

فكرة السفر و و الرومانسية و الجواء الحلوة كلها تينن ، بس وقت الصجية ترى الشعور غريب على حلو ، في بعض الزيجات تتحدد علاقاتهم و اهما مسافرين سبحان الله من هناك تستوعب البنت انه هذا الريال ما تقدر تكمل معاه ووايد سمعنا مثل هالمواقف و الله يبعد عنكم الفراق و الطلاق انشالله  

اللي خلاني اكتب هالموضوع انه هالأيام موسم الأعراس مشالله  و قاعدة اسوي سيرج حق اكثر من شخص على فنادق و منتجعات 

شهر العسل يعتمد على وايد اشياء 

اهمها انتوا الأثنين  شنو تبون ووين تبون تروحون ، ظروف دواماتكم ، و مدى علاقتكم فبعض 

وايد ناس يحبون يسافرون ليلة العرس او ثاني يوم العرس 

شخصيا ما افضل هالشي و طبعا الناس اذواق ترى  

اذا كان في "ملجة" يعني قاعدين تطلعون و تروحون مع بعض ممكن تسافرون ليلة العرس  يعني انكم شوي تعمقتوا بأطباع بعض و ممكن انكم تسافرون ليلة العرس او ثاني يوم مع انه والله تعب , العرس يبيله على الأقل اسبوع راحة . 

تجربتي انا كانت خطبة و بعدها عرس و سافرنا بعد ثلاث شهور و كلش كلش ما كنت متحسفة على هالشي ، احس انه عشنا مع بعض 3 شهور شوي عرفنا بعض اكثر عشان جذي بالسفرة الوضع كان وايد مريح . 

مثلا شنو بعض الأطباع اللي راح تعرفونها عن بعض ؟

طريقة النوم ، اذا نوعها تسهر، و لا نوعه نومه ثقيل ، وقت الأكل و الروتين اليومي حق قعده الصبح ، اذا اهيا تطول لما تلبس و لا لأ اذا الملابس لازم تطلع من الليل او نفس الوقت ووايد اشياء صغيرة ما تعرفونها  الا اذا عشتوا مع بعض و احس انه نتأقلم عليها قبل لا نسافر وايد احسن من انه نعرفها بالسفر 

لازم تتكلمون و صج تفهمون بعض انتوا شنو تبون ، 

الكل يقول روحوا جزر و اماكن هادية 

انا نصيحتي لأ ، اذا موضوع الجزيرة مهم ، خلوها بآخر الرحلة و روحوا قبلها مكان ثاني ، احس السفرة لازم فيها اشياء تسوونها ، 

Activities 

اوكي ندري شهر عسل و الهدف انه بتكونون متجابلين بس عاد لازم في اشياء تسوونها 

روحة المالديف و غيرها من الجزر اللي بالليل ماكو شي تسوونه ،  افضل انه تروحون لها بعد 6 شهور من الزواج او بعد سنة كنوع من التغير لأنكم راح تكونون محتاجين راحة 

بس أول سفره لأ روحوا ديرة فيها حياة بالليل تسوونها عشان لا تملون و بعد ارجع اقول الناس اذواق 

من الأشياء المهمة اللي لازم يستوعبونها الأثنين 

اول شي  الزوج 

 يمكن زوجتك تلقاها تبجي فجأة ، ترى عادي الوضع يديد عليها يمكن تكون ولهانة على اهلها رفيجاتها بس ترى مو لايعة جبدها منك صج  

 الحين الوضع حياتنا كلها تصوير لا تستعسر عليها  خلها تصور و صور معاها ، انت تعال و قولوها شكلج اينن خل اصورج و خلها تحس انك طاير فيها ، و صج انت طاير فيها  بعد شنو ؟؟ 

 البنت مرات تستحي ما راح تطلب منك تشتري شي او راح تحس بلإحراج  انت خلك فاهم و فطين  

 فاجأها هناك ، يا اما تشتري لها هدية و اهيا ما تدري او جهز عشا رومانسي هالشي اتفق فيه مع الفندق او الريزورت 

- مرات تصير شغلات تخرب الرحلة لا تعصب عليها و اعتبر كل شي مغامرة و طمنها  انه عادي و ما صار شي . 

 لا تدقرها او تزعلها حتى لو اهيا مليقة شوي طوف و تحمل ، شوي بس 

الحين الزوجة : 

 يمكن تحسينه متوتر و معصب شوي ، ميخالف الريال اول مره يسافر معاج و راح يكون وايد خايف انه يصير فيج شي لأنه انتي الحين امانة و اهو مسؤول عنج . 

 خلج سهلة و لا تستعسرين ، عادي تتعشون بمحل سندويتشات صغير لأن ما لقيتوا حجز بالمكان الفلاني مثلا ، هذي السفرة هدفها انكم تكونون مع بعض و انتوا مع بعض 

 السوق : كلنا نموت على السوق و عادي نسافر 10 ايام بس سوق لكن انتي لازم تعرفين طبيعة رييلج ، اذا ما يحب السوق ترى مو مهم بهالسفرة تروحين كل يوم السوق ميخالف  بس هالسفرة طوفي . 

 جهزي له هدية حلوة و عطيه هناك ، و لا تنسين انج تبينين له انج مستانسة و مرتاحة  معاه و قولي له ، هالشي وايد وايد راح يخليه يتطمن و ما يتوتر  

- يمكن تحسين انه كله يبي ينام ، و هالشي صار فيني انا شخصيا بعد العرس لأن طول فترة الملجة و الخطبة الريال مشغول و تفكيره متوتر و الحين خلاص ارتاح فراح تلاقينه انه يبي يعوض و ينام ، نصيحة انتي بعد حطي راسج و نامي لأن صج شهر العسل لازم يكون شهر راحة 

- لا تنسين عمرج و تشتطين  ، انتي تكلمين اللي يبيع و لا الجرسون و مادري شنو ، ندري انه اغلبنا احنا الكويتيات اشتطاط و ندبر امورنا من عمر ، بس الحين انتي معاج ريال خليه اهو يبدا و انتي عاد دشي معاه بالسالفة  و شوفي طبيعة رييلج شلون  في ريال يحب انج  تكونين معاه خطوة بخطوة و في ريال لأ نوعه لأ انتي قعدي  و انا امشي الأمور 

النقطة اللي بكتبها الحين تعتبر محرجة للبعض من الحين اقول اللي بينتقد و ما يحب يقرا لا يقرا : 

اذا انتوا رايحين جزيرة و هدفكم سباحة و اتوقع هالنقطة مهمة حق شهر العسل كله  ،  بالنسبة  حق فترة الدورة الشهرية  تاكدي من موعدج لأن وقتها ما راح تقدرين تسبحين  و راح ينعفس الوضع كله ، انصح  كل وحده انها تنزل ابليكشن 

I period 

ضبطي نفسج عليه و راح يعطيج تواريخ 6 شهور جدام عشان تضبطين امورج 

زرعنا شجرة حبنا بالمالديف 

:))))))

شهر العسل هذا لكم عيشوا الحب كله فيه و انشالله ايامكم كلها شهر عسل و خل اقولكم

 شي كل سفره بعدها راح تصير احلى و احلى