من امس و انا عندي احساس انه اليوم الأربعا حتى الكتب الرسمية بالدوام حطيتها بتاريخ الأربعا
من زمان ما كتبت بوست عن احلى شي بالدنيا
"الحب"
مشاغل الدنيا و الأشياء اللي تصير تخلينا شوي نلهى ، انا من زمان احب اطلع كل اللي احس فيه بالكتابة و هالشي يريحني
عشان جذي حاسة اني متضايقة لأن وايد اشياء تحوس بقلبي و عقلي و ما عندي وقت اكتبها
انا انسانة وايد واقعية ترى ، بس ارجع و اقول ان الحب من اهم الأشياء بحياتي ، الكل يدور عن الحب و الكل وده يعيش الحب بنات او شباب ، الحمدالله التفكير المنغلق بدا وايد انه يتغير بين الكل
انا وايد استانس لما اشوف شخصين يحبون بعض صج استانس و كله اقول ان انشالله يتزوجون
و لما اشوف متزوجين يحبون بعض بعد هالشي احلى
بس في شي يضايقني ، متزوجين و لكم الحق انكم تحبون بعض 24 ساعة ليش تحطون حق نفسكم قوانين سخيفة ؟؟؟
وايد سمعت من الناس انه اذا شافوا وواحد ووحده و مرات يكون اهو ماسكها لما يمشون او حاط ايده عليها على طول فسروا هالشي
"انه عندهم مشاكل بالبيت و هذا نقص يبون يعوضونه "
اتضايق وايد من هالنظرة بس بعدين فهمت لأن المجتمع كله مجاملات و نفاق عشان جذي ماكو تقبل للمشاعر الصجية
انا شوي كنت حساسة من هالموضوع بس ج هذي كانت طريقته من اول ما تزوجنا لي اليوم الحمدالله
لما نمشي وايد يحب انه يكون ماسكني و عرفت بعدين انه هذي اهيا طريقته و تعودت و صج قام ما يهمني احد
و مره كنت قاعدة بمكان و صار كلام عن شخصين متزوجين و اهما مشاهير بعلم الطاقة بغض النظر اذا انا مهتمة بهالشي اولأ بس كان الكلام انه شلون لما يكونون طالعين يكون ماسكها و لامها صوبه و كلام وايد
صادفنهم انا و ج بمعرض و صج كان زوجها ماسكها و لامها صوبه ما استغربت كلش و لا حسيت نهائيا انهم يمثلون لأن انا كان ج ماسكني نفس الشي ؟؟؟
قعدت افكر شنو المشكلة يعني ؟؟ ليش اذا شفنا جذي نقول يمثلون و لا فيهم نقص ؟؟ ليش مو حب مثلا ؟؟
في شي يغثني عاد اللي تقول احنا بره الكويت ناخذ راحتنا بس بالكويت كلش كلش ما يرضى ؟؟؟
ليش انشالله ؟؟ بره الكويت يتحول و بالكويت خلاص تختفي مشاعره ؟؟؟
ما اقدر افهم الناس عندنا الصراحة بس اللي افهمه اني
هذي فرصتي بالحياة اللي راح اعيشها مرة وحده و ما راح اتغير و راح احب و استمتع بالحب عاد اللي بيفسر و بيقول نقص و مادري شنو قاعد يطلع حياته فينا
نصيحة للمتزوجين و للريايل اهم شي
الحب اذا ما قعدت تزيده كل يوم انت راح تحس انه خلاص راح و را تقعد بالدوانية تتفلسف على ربعك انه الزواج ملل و غثى لأنك انت مسكين مو قادر تعيش الحب و تستانس
No comments:
Post a Comment