Tuesday, September 17, 2013

بنيان البيت بالكويت ، لقافة المجتمع



من اكثر الأشياء اللي تزعج الشخص اللي يبني بيته 
كل الناس اللي قاعدين يشاركون بآراء و اقتراحات على اساس انهم بيسكنون معاكم 


طبعا انه الواحد يستشير و يسأل الناس اللي عندهم و يشاركون بأرائهم الصح ابدا ما فيها مشكله 

لكن تعالوا حق الناس اللي مالهم شغل 

اتمنى انه نستوعب شغله اذا الشخص اللي يبني بيته ما سأل رجاءا احتفظوا برايكم حق نفسكم 


انا موضوع البيت متكلمة عنه من قبل اني الحمدالله معتمده على جاسم بالموضوع كله بس قلت له احتياجاتي و اهو راح حق المهندس و خلص الخريطة و كل شي و استشار واحد من خوالي اللي توه باني البيت و اهو معاه خطوه بخطوه 

بس الصراحة مو قاعده اتدخل و لا شي لسبب وايد مهم 

انا بالنسبة لي جاسم اهم من البيت بكبره 

مو مستعده اخسره بهواش و نجره على بيت كلش مو مهم 

و هذا الشي اللي الكل يقوله انه اغلب الأزواج هواش و نجره فتره بنيان البيت 

عشان جذي لما يسالوني الناس ها شصار 

اقول و الله الموضوع كله عند جاسم 

طبعا لأن ما في اي مجال انه يسالوني اي اسئلة ، الكل يقعد
ينتقدني اني شلون انا جذي ساكتة شلون مو قاعده اتدخل شلون انا باردة 


خلااااااااااااااااص 

ههههه واحد من الحوارات اللي تصير 

ملقوفة : بتسوون سرداب 
انا:لا ما اعتقد 
ملقوفة:لا ليش لازم سرداب
انا:لا و الله ما احتاجه
ملقوفة:لا و الله لازم سرداب حده مفيد 
انا: مادري و الله ما اعتقد نحتاج 
ملقوفة : لا والله تحتاجينه 
انا :لا ما في داعي 
ملقوفة:ما عندج سالفة سووي سرداب 
انا:لا احنا ما نبي 
ملقوفة :لا و الله السرداب زين 



.................................و يستمر الحوار الى ماله نهاية 

1 comment:

shwaishh said...

LOL i remember when we were building our house SO MUCH DRAMA wisiba il ligafa. o ham lazim sirdab!