يا تتكلم و تقول مواصفات البنت اللي تبيها او اسكت طول عمرك

ذوق الأمهات 

"  ياحلوها خوش بنية و شحلوها جميلة و بيضة و حتى كحلة مو حاطة و تشبه فاتن حمامة و لبسها ناعم و الشعر اسود ليل حتى صبغ  مو مصبوغ  مشالله عليها سنعة 

مادري شنو علاقة الصبغ و التان بالسنع عند الأمهات 

بس ذوق الناس اللي بعمرنا ممكن يكون 

عاد انا قلت ممكن مو لازم الكل يحب هالستايل بس ابي اوصل فكرة فبالي 


ملاحظين انه ذوق الأمهات وايد يختلف عن ذوقنا و خاصة في مقاييس الجمال ؟؟ 

و هالشي يخليني وايد استغرب لما واحد يفكر يتزوج و يقول حق امه اختاري لي و تختار له امه و يمكن هالستايل ما يعجبه بس عشان عجبت امه يوافق ؟؟؟ 

احس انه شي وايد مهم بالخطبة انه الوحده تدري انه هالريال  تقدم لها شايفها و لا بس عشان ذوق امه 

يعني عادي الأمهات تعجبهم وحده بيضة وويها مدور و الشعر اسود طول واحد و الحلج صغير !!مواصفات البنات بأفلام الأبيض و الأسود 

يعني شوي فاتن حمامة و شادية 

و عادي احنا تعجبنا وحده سمرة و تان و الشعر مصبوغ و الملامح حاده 

يعني الستايل مختلف مختلف 

الصراحة مادري شلون الشباب يتزوجون جذي على الشكل اللي تختاره امه و حتى لو مو ستايله و لا ذوقه !!!و اعتقد هالشي من اسباب المشاكل بعد الزواج 

انا انصح اذا تحب البنت تكون سمره او حنطاوية قول و تكلم لا تستكت بس عشان امك تحب البنت البيضة 

و على فكرة اغلب الأمهات يهمهم البنت تكون بيضة لو كانت مسكينة كلش مو حلوه بس المهم البياض 

و بوايد مواصفات 

انا هني نهايئا مو قاعده اتكلم عن الأطباع او الأخلاق او السنع موضوعي اليوم عن الشكل 

يعني بلأخير لا تسكت و بعدين تقعد تعقد بنت الأوادم معاك و تقولها انا  احب البنت اللي جذي و انتي مو على ذوقي و لا الشي اللي احبه 

لأن صج صج تلوع جبدي لما اسمع سالفة من وحده تقعد تشتكي و تقول اي انا زوجي يحب البنت السمرة و اهيا حدها سنووايت !!و تقول انه قام يقولها ترى تلوع جبدي من البياض 

او الثانية اللي تكون شوي طويلة فجأة الأخ يستوعب انه يحب البنت القصيرة !!و مو عاجبه طولها !!شتسوي يعني تقص ريولها عشان حضرتك مثلا ؟؟ 

الريال اللي يبي يتزوج لو سمحت 

ركز شوي