نار رييلج و لا جنة أهلج في برنامج القايلة @gaaylaa@

انا امووووت على برنامج القايلة 

اهو البرنامج رقم واحد اللي لازم لازم اسمعه و ما يحتاج اتكلم عنه لأنه البرنامج الإذاعي الأول بالكويت 

أمس كانوا مقابلين الأخت الفاضلة 

أم عامر و اتوقع كلكم تعرفونها 

انا من زمان ما اتفق معاها بوايد اشياء بس طبعا هالشي راجع لي انا و لا ننكر انها مشالله معروفه بالكويت و لها معجبين و محبين وايد حق رأيها 

الكلام اللي بكتبه مو هجوم عليها و لا اني بس ابي اناجر او اخالف بالراي 

ابي اتكلم بشكل عام 

اغلب الأمهات الكبار دايما هذا راييهم فينا احنا بنات هالجيل 

و خاصة اذا كان الموضوع عن الزواج و المتزوجين 

ادري مشالله اول اهما السنع كله و محد ينكره 

لكن للأسف الإنتقاد كان وايد قاسي علينا  الحين و تقول لا تقولون انتوا اول غير و احنا غير 

بس انا ارد و اقول 

صج انتوا اول غير و احنا غير 

يتكلمون عن مفهوم الزوجة السنعة انها هذدي اللي تجهز السفرة و تجابل ضيوف الخالة و تسوي  و قاعدة بالبيت و شحليلها 

صح البنت اللي تسوي جذي سنعة اذا كان الزوج هذي رغبته بزوجته انها تكون جذي 

وقتنا الحين 

في وايد خالات عندهم حياتهم و شغلهم و طلعاتهم و سفراتهم  مو معقولة تيي مرت الولد و تصير هذي البنية اللي لازقه بالخاله نفس ايام قبل ؟؟ 

لأن ما ينفع ؟؟ 

دايما يتكلمون عن انه الريال يبي يرد البيت يلقى الأكل مسنع  و ما يبي يسمع صيحة اليهال و هالكلام 

انزين حاليا اغلب الزوجات موظفات ترى نفس الوضع 

ليش اخش الياهل عن ابوه عشان لا يزعجه ؟؟؟ 

ابي بس الأمهات يستوعبون شغله 

ترى حتى نظرة الريال للزوجة تغيرت ؟؟ 

ابي الكل يفهم اني مو قاعده اهاجم و لا اقول هالنموذج احسن من هالنموذج 

في ريال مو مهم عنده الزوجة طبخت و لا ما طبخت 

مهم عنده انه زوجته تكون معاه بكامل طاقتها و حيويتها تكون فريش و انه اذا قعد معاه يقدر يسولف  ما تكون تعبانه لأنها طابخة و منظفة و متسبحة بعد الطباخ و لوية 

و على ما يبدي يسولف معاها الا داخت و مو قادرة تركز من التعب ؟؟؟ 

كتبت عن هالشي من قبل انه العلاق بين الأزواج فيها وايد لغات و لازم يعرفون اهما الأثنين شنو اللغة اللي يتكلمون فيها مع بعض 

و لازم لازم هالشي يعرفونه من الخطبة 

مثال : 

ما يصير  انه  الزوجة اللي تكون شخصيتها شخصية  (الأم)اللي تكون اهيا اللي قاعده بالبيت و اهتمامتها بيتها و عيالها و هالشي يسعدها 

و نهائيا مو غلط بس هالشي مسبب لها سلام داخلي و ماتبي شي اكثر ، سعادتها بعيالها و زوجها  

ما يصير هذي الشخصية انه تتزوج شخص كل هلأشياء مو مهمة عنده كثر ما انه تكون زوجته 

Girlfriend 

انه اهتمامها فيه اهو اول و تكون رفيجته و يبيها لويه و يبيها تسولف و يكون عندها حياة بره البيت 

ما راح يقدر يتأقلم و راح يحس انه مو سعيد و لو تكلم راح يقولون له 

قايمة فبيتك و عيالك  و اكلك جاهز و هدومك نظيفة 

مالك  عذر 

صح  ماله عذر اذا اهو حاب هالنموذج  بس اذا اهو ما يحب هالشي ما راح يكون سعيد 

شكثر سمعنا قصص عن وحده تكون و تعتبر زوجة مثالية بنظرة المجتمع 

اهيا اللي تطبخ 

و ما تطلع 

و مستعده تلغي حياتها الإجتماعية عشان تجابل بيتها 

و مربيه عيالها و مجابلتهم 

و اخر شي فجأة 

زوجها متزوج عليها 

و متزوج وحده بشخصية مختلفة نهائيا 

ليش ؟؟؟ 

لأنه بلأساس لما قرر يتزوج ما كان عارف شنو اهو يبي نوع زواجه يصير 

و الزوجة سنعة و قايمة بكل شي يبيه منها المجتمع و الصورة اللي تعلمنا عليها 

بس هل كان زواجها ناجح ؟؟ لأ 

مو لأنها مو زينة  بس لأنه مو هذي شخصية الزوج اللي تصلح لها 

مثل لما يشوفون وحده نوعها ما تطبخ و ما تسوي شي و طلعات و روحات 

و نشوف الرييل مدللها و مستانس و مرتاح 

شنو الحجي اللي يطلع ؟؟ 

انه شنو هالحظ و ما يبقى مثل ما يقولونه 

بس اهما مرتاحين و مستانسين ليش ؟؟ لأن الشخصيتين راكبين على بعض اهو هذا النموذج من الزوجة اللي يبيه عشان جذي مرتاح 

لازم لازم بالخطبه تعرف كل وحده و كل واحد شنو الصورة اللي فبالهم للزواج و هالشي بعد تكلمت فيه وايد و كتبت عنه وايد من قبل 

مابي احد يفهمني غلط انا ما قلت انه الأولى غلط و لا الشخصية الثانية غلط 

انزين لا اطلع وايد عن الموضوع

النصايح القديمة ما تصلح بوقتنا الحين لأن صج الريال تغيير 

بعض الريايل الحين يفضل الزوجة اللي تكون عندها هوايات و نشاطات غير الأشياء العادية  و يفتخر فيها  و ما عنده مشكله 

في قرية كويتي و افتخر مثلا 

شكثر شفنا مشاريع و افكار من بنات و نلقى انه الزوج مساندها وواقف معاها و مفتخر فيها ؟؟ 

هل هذي الشخصية من الرجل راح يكون سعيد مع الزوجة اللي تكون شخصيتها و اهتمامها الأول بس بيتها و عيالها ؟؟ 

طبعا لأ ؟ 

احب اتكلم عن تجربتي الشخصية لأن هذا بلوقي صح 

:P 

انا شخصيا من زمااااااان من قبل لا اتزوج ،  الصورة اللي فبالي للزواج 

نهائيا ما كانت الصورة التقليدية 

انا ابي زوجي رفيجي 

ما يمنعني انه يكون عندي نشاط او هواية  و يشجعني 

و الحمدالله  الله رزقني هالشي 

الفضل الأول و الأخير اني قاعده امارس هوايتي اهو 

ج 

لو كنت متزوجة واحد كل الصفات الزينة فيه من كل ناحية 

بس ما يحب زوجته تكون عندها اهتمامات بمواقع التواصل الإجتماعي و هذا من حقه 

ما  راح يوافق انه يكون عندي بلوق 

و انا اللي يعرفيني  يدري انه بلوقي  بدا مع بداية زواجي عشان جذي اسمه 

Life After Marriage 

و البلوق يشغل و ياخذ وقت و بعد فترة الوحده تنعرف  و بعدين قمت احضر ايفانتات 

لو كنت متزوجة شخص ما يحب هالشي و لا يقدر يشجع 

و يكون ريال وايد زين من كل النواحي 

هل راح اكون سعيدة ؟؟ 

ما اقدر 

لأن مو شخصيتي و لا راح اقدر اعيش جذي 

شي ثاني 

ج مو مهم عنده ابدا اني اطبخ (طبعا انا وايد اتكلم على سالفة الطبخ لأن وايد كانوا يقولون شلون بتعيشين فبيت رييلج و انتي ما تطبخين )بس الحمدالله كاني عايشه 

:) 

بس مهم عنده اني اكون وحده مهتمة بوزني و العب رياضة 

و مهم عنده اني ما اكون بس قاعده جذي بالبيت و احن على راسه يحب انه يكون عندي نشاط و هوايات و اهتمامات 

و سبحان الله احنا الأثنين توافقنا 

و هالشي من  فضل رب العالمين 

شفتوا شلون مو شرط النصايح اللي تقدمها الأخت ام عامر تمشي معانا الحين مع احترامي لها 

و مو معناته انه احنا مو سنعين او حياتنا الزوجية مو ناجحة 

الجملة اللي هزتني امس و خلتني اتنرفز يوم قالت 

يا بنيتي 

نار رييلج و لا جنة اهلج 

ابي اعرف بس لو بنتها او حفيدتها يتهم تشتكي انها ما تقدر تعيش مع هالزوج ماني قايله لأنه يخون و لاني قايله انه راعي خرابيط  و لاني قايله انها يطقها 

لو تييها و تقولها يما انا مو سعيدة  بحياتي معاه ما اقدر اكمل حياتي جذي 

راح تقولها هالكلمة ؟؟ راح تغصبها انها تعيش و تضييع عمرها بحياة مو حياتها ؟؟؟ عشان هذي الكلمة ؟؟ 

الأهل عزوة و الله لا يخلينا منهم يا رب و انشالله كل وحده تطلع من جنة اهلها لي جنة زوجها 

ليش اضيع عمري و اعيش بنار ؟؟؟ 

الكلام وايد فبالي بس مو عارفة شلون اكتب و الله 

و انشالله قدرت اوصل فكرتي 

ما قصر مايك يوم قلت له انه لازم تسوون حلقة للرد 

و قالي نرتبها انشالله