الحمدالله لي الحين انا مستمرة على النظام اليديد اللي دخلته بحياتي
الأكل الصحي
و الرياضة
الله يتمم انشالله
لازم اقولكم شنو اللي صار خلال هالفترة عشان اللي ودها او وده انه يغير ما ينصدم بالواقع المرير
انا من الناس اللي احب اني انشر الخبر اني قاعدة اسوي ريجيم ، ليش ؟؟؟
لأني راح اتفشل اذا فكرت اخربط و راح استحي من الناس
انستغرام وايد فادني بهالشي لأني راح اكون مستحية من كل هالفولورز و لازم اشوف تغيير
طبعا كل واحد في اختيار الطريقة اللي تريحه انه يبدا يغير و انا اخترت نظام الوجبات و كتبت وايد من قبل عنهم
الشي اللي ابي اتكلم عنه بهالبوست اهو موضوع اللقافة
طبعا التعليقات ما تخلص
كل وحده قاعده و مجابلة فطاير و سمبوسة و ماكلة و مرتاحة و بس يعلقون و راح اقولكم نماذج من التعليقات
وييه شحقه مشتركة بوجبات ؟؟ خساير فلوس
اوكي انا قلت لج دفعي ؟؟؟
ما ينفعون اشتركت شهر و رديت
اكيد بتردين ؟؟ بترجعين تاكلين ؟؟ نفس اكلج ؟؟ اكيد بتردين
و بعدين بشهر جسمج لي الحين ما استوعب الموضوع
خلاص انتي سوي اكلج بروحج
انا اشتركت معاهم لأني ما اعرف اسوي اكلي بروحي
و لو شنو انا اعرف اطبخ ما راح اقدر اضبط لي اكل و سناك و طريقة طبخ نفس الشي اللي قاعده اكله
كلها جم شهر و تملين
صح الوضع ما يونس لكن اذا الواحد خلاص يبي نتيجة و ماكو جدامه شي لازم يحب الشي اللي قاعد يسويه
و بعدين التنوع بلأكل بالوجبات كلش مو قاعد يحسسني بالملل و خلاص حبيت اكلهم
ويييه شلون ما تتغدين مع رييلج "وع"شلون جذي
صج و الله قالت
وع
هممم هذا شي يعتمد الريال اللي يحبج و يخاف عليج راح يساعدج و يبيج تصيرين حلوة و جسمج حلو و صحتج زينة
و بعدين انا ظروفي بالبيت مساعدتني شنو المشكله ؟؟؟
الحين عاد نيي حق موضوع الرياضة ، بهالسالفة مشالله الكل يصير مدرب
اهم شي انج ما تلتفين حق الكلام نهائيا
اذا انتي داشة نادي التزمي بكلام مدربتج
اذا قاعده تتدربين بالبيت كملي غلى شغلج اللي تسوينه
دشي قوقل و يوتيوب و اخذي تمارين من الناس اللي تعرف صح
عشان لا تنصدمين راح يضحكون عليج وايد ناس
راح تسمعين واااايد هالكلمة و يقولو نها بنبرة مليقة
عاد استمري عاد
شتبين ؟؟؟؟ صج صج شتبين باسلوب التهديد هذا ؟؟
ودي اقولها عاد تحركي شوي عاد بنفس الإسلوب
راح تحسين نفسج انج وايد مشتطة و هالشي زين ما عليج من الناس اشتطي و تكلمي بالرياضة و تكلمي عن شعورج و مالج شغل
انزين الحين مشالله نزلتي و جسمج صار شي و اندقروا
عاد تبدا اللقافة
شنو تلعبين بالبيت رياضة ؟؟
انا من النوع المشتط اللي اقول و احب اشجع
و اشتط ساعات
و تسألني عندج جهاز مشي ؟؟
لما اقولها اي و اني شارية جهاز يعتبر نوعا ما غالي لأن اهم شي يكون الجهاز زين عشان الركبة
تصدمني بالرد
وييه شدعوه ماله علاقة اخذي اي جهاز من النصر شحقه الخساير
حبيبتي ؟؟ كيفج و الله كيفج ما غصبتج بس انتي اللي سألتي !!!
بعد في ناس اللي يدورون الشي السهل مع احترامي لكل رفيجاتي انا احبكم وايد
لكن في ناس يقولون
سويي عملية ، شد ، قص و لويه
شوفي اذا انتي وزنج واااايد زايد و انتي تبين تنزلين بسرعة و ما تلتزمين ما تقدرين و ما الومج لأن انا مريت بكل هلأشياء
سوي العملية و انتي مغمضة
انا الحين هدفي الصحة و هالشي صج صج شفته من بعد ما لعبت رياضة
بشرتي تغيرت و شعري و حتى لون عيوني (بياض العين)الحمدالله وايد وايد احس نفسي فريش
جسمي خفيف و حركتي صارت سهله و هالشي بالرياضة
الحمدالله جسمي مشدود و متناسق
مقارنة بالشي اللي كنت عليه
عشان جذي انا مابي عمليات لأني مستمتعة بالشي اللي اسويه
هذي بعض النماذج الملقوفة
بس اهم شي لا لا لا تتأثرين
انا اكثر وحده بالعالم يهزني الكلام لكن لا تتاثرين
و تذكري شي واحد
يمكن مو صج بس ونسي نفسج
اللي يحبطج
محتر منج
:P
No comments:
Post a Comment