صباح الخير و يوم الأحد المليق ، نعم احاول اتفائل وودي احط مشاعر التفاؤل و السعادة بكلامي
بس ما اقدر اجامل الصراحة
بس الحمدالله قمت مبجر ووصلت الدوام متاخر من الزحمة
الويكيند كان وايد فيه لوية
و لوية متعبة الصراحة
قررت انا من السنة اليديدة اني اتحاشى المواقف المزعجه من الناس ، و طبعا الواحد لازم يعدل شغلات بنفسه لأن مو شرط الناس يكونون غلطانين بكل شي
قررت اني اتحاشى و ما ارد على الناس اللي تنتقد بدون سبب و اللي تعتقد انها تنصح بس طبعا طريقتها و توقيتها غلط
و من زمان في ناس حطيت معاهم حدود لأنهم راعين كلام و قيل و قال
و الشي المهم اني اصفي النية و اسامح اللي غلطوا
ترى مو سهل و الله !!احنا بالكويت شعب المشاكل فمهما الواحد يحاول يصفي نيته ماكو فايده كلش هههه غصب يخلون الواحد يعصب
انا مو فاهمة الناس اللي تلف و تدور و تحاول تشوه او تخرب سمعة الأشخاص ما يدرون انه الحجي يلف و يوصل حق الشخص ؟؟
و مو كل الناس راح تتصرف بذكاء لأن هالشي يضايق بس الحمدالله اذا الواحد عنده اشخاص يحبونه و بالذات الشخص الأهم اللي يحبه واقف معاه
مو مهم الباجي
اتوقع شفتوا برنامج
IWish
و الكلام اللي صار عليه و اللويه
هذا برنامج تلفزيوني ، و النجاح اللي يبونه اللي مسوين البرنامج ، انه الناس تتكلم
و هالشي وصلوا له
انا شخصيا مو من محبين برامج تلفزيون الواقع الصراحة امل و ما اقدر اتابع
عشان جذي بس شفت الحلقة الأولى
اتوقع الكل درى انه زميلتي و صديقتي بالعمل
هيفاء الفزيع من المشاركات بالبرنامج في فئة ادارة الإعمال
و انا كلموني البرنامج انه يقابلوني عشان اتكلم عنها و عن شخصيتها و حياتها
و شفتوا المقابلة كاملة طول الإسبوع اللي طاف
الهجوم اللي حاشني بالحلقة الأولى مو صج !!!الله يعين لو انا مشتركة !!وايد اشخاص كلموني كلام خلوني احس اني كفرت اعوذ بالله
لأن قلت عن موضوع الحجاب
سؤال
شلون انا راح اقول كلام موزين عن الحجاب و انا متحجبة ؟؟؟ و انا متحجبة عن اقتناع و بروحي و من يوم كان عمري 14 سنة
اللي قلته اني مو عاجبني انه هالإنسانة فصخت الحجاب
لكن هذا قرارها و مافي احد له الحق انه يحاسبها !!اللي سوته غلط و اتمنى انها ترجع تلبسه
لكن مو من حقكم انه تحاسبونها او تحاسبوني على رايي!!
انا مو انسانة منافقة الف و ادور انا اللي بقلبي اقوله و انا انسانة واضحة
اللي انتقدوا كلامي ،ابيكم تثبتون لي انكم مشالله مطبقين الدين كامل
و صديقتي ، مو عشان اهيا صديقتي بقول هالكلام ، يمكن غلط انها خذت هالخطوة لكن هالشي ما راح يأثر ابدا على الصفات الزينة اللي عندها و اخلاقها و يكفي برها حق امها و ابوها و معاملتها حق اهلها
ما راح اطول و اتكلم عنها وايد لأن الله سبحانه و تعالى بالنهاية يبين الحق و الناس اللي تكلمت راح تاخذ سيئات
عموما اللي مو عاجبه البرنامج لا يشوف مو غصب
بس تعودنا على التعليقات و الكلام السلبي
امس تكلمت مع البلوقر الرائعة
استكانة
بتويتر ، و انها كانت كاتبة عن التعليقات السيئة بانستغرام
للأسف عودنا نفسنا ما نمدح بس عطينا نفسنا الحق بلإنتقاد
حسيت انه الناس ما يبون الواحد انه يظهر سعادته بحياته و فرحته بلأشياء اللي عنده
لأن عيب او مثل ما قالت استكانه
انه راح يقولون مو شايف خير
انا اظهر سعادتي بحياتي و بنفس الوقت اذا عندي مشكلة او ضايق خلقي الكل يدري
الحمدالله مو قاعده امثل و حياتي واضحه للكل و يمكن هالشي له اثار مو زينة علي لكن ما عندي مشكله
شرايكم ؟ لي متى هذا اسلوبنا ؟؟ لي متى نعطي نفسنا الحق ننتقد ؟؟
No comments:
Post a Comment