قبل و بعد : الرياضة و الريجيم

بما اني انسانة حنة و كله مستعيلة ،من بديت الريجيم و انا بس احن انه ماكو نتيجة و ما تغيرت وايد اوكي تغيرت قياسات ملابسي بس ماني قادرة ارضى على الشي اللي وصلت له 

الحمدالله اني تقريبا كل يوم اصور و كنت مصورة بأول يوم بديت فيه الدايت 

و حاطه فولدر عندي كله صوري 

امس قمت طلعت الصورة 

و قارنتها بصورة امس مصورتها ، كنت لابسة نفس اللبس بس زياده عليه لابسه جاكيت بعد 

و الحمدالله لاحظت الفرق و من حطيت الصورة بانستغرام مشالله الكل شجعني و لاحظوا الفرق 

انا تفاجأت الصراحة 

ووايد استانست  

انا من الناس اللي احب التشجيع وايد قالوا لي لا تحطين بانستغرام و لا تقولين حق احد انج مسويه ريجيم 

انا ما عندي هالإحساس اذا ما احس انه العالم كله مشاركني و لا ما اقدر 

من الأسئلة اللي وصلتني انه شنو نظامي 

انا مشتركة مع 

Calorie Control 

وجباتهم وايد عاجبتني في ناس ما حبوهم بس انا الحمدالله مرتاحة معاهم 

النتيجة بينت من الشهر الأول 

بس الحين فرق وايد علي بعد 3 شهور 

الموضوع كله يبيله صبر و التزام 

انا اكثر وحدة كنت احن انه ما اقدر  و ما اقدر التزم 

بس وصلت  حدي الصراحة 

النزول بطيئ لكن النتيجة واضحة 

الشي الثاني 

الرياضة 

انا انسانة كسلانة 

بس خلاص ماكو حل جدامي 

شنو الرياضة اللي العبها ؟؟ 

ترى شي بسيط  و على قدي 

امشي تقريبا من 20 الي 25 دقيقة  على جهاز المشي 

بس طريقة المشي مختلفة و هالشي لقيتها بيوتيوب 

امشي 5  دقايق بسرعة عادية و بعدين دقيقة كاملة اسرع شي اقدر عليه 

و اركض 

و بعدين 5دقايق ارجع على السرعة الأولى 

و بس بعدين اسوي تمارين مختلفة 

و كلها اشياء مطلعتها من يوتيوب بسيطة و تكون تمارين حق البيت 

اكتشفت انه الرياضة مو لازم نادي و اعذار مالها سالفة 

اللي يبي الشي يسويه 

من النصايح اللي ابي انصحها 

حاولوا ما تتأثرون بكلان الناس اللي حولكم  

ناس راح يقولون لكم و الله فلانه جربت هالشي و ما نفع 

و اللي تقول شحقه روحي سويي عمليه  

ووايد كلام ماله داعي 

و اللي تقول لا تلعبين رياضة لأن راح ترجعيت تمنتنين !! اكيد راح ارجع امتن اذا وقفت رياضة هذا شي طبيعي 

طبعا ج من زمان و اهو يحاول يقنعني انه الرياضة لازم تصير شي اساسي بحياتي 

و اعترف اني اقتنعت الحين و كلامه صح 

و اذكر كلام رفيجتي ام لولو 

انه النفسية تتغير بالرياضة 

و صج 

الموضوع كله انه الرياضة تصير جزء من حياتنا مع الأكل الصحي 

الحمدالله بشرتي صارت احلى و نفسيتي احسن 

هذا نظامي و ماكو شي زيادة ، اللي يبي من نفسه راح يوصل حق الشي اللي يبي بس اذا بس بنقعد و بنتكلم ما راح ينفع 

اللي يعرفوني يدرون انا شلون كنت كسلانة و كله مابي اتحرك و ابي اضعف و هالشي ما يصير 

و الله النتيجة من عقب التعب وايد حلوة و تحسون بانجاز