Sunday, January 27, 2013

لقاء الوزراء العبدالله - الصالح- الحجرف مع البلوقرز ،و خيبة املي



اي خيبة امل ، ما عرفت شنو اكتب باللهجة الكويتية 

من قراراتي بالسنة اليديدة اني احاول اني اكون ايجابية و اشوف الشي الزين لكن في مواقف تجبر الواحد انه يتحلطم 



بصراحة هذي الخطوة من الوزراء وايد وايد خطوة مميزة و بالعكس خلتنا نحس انه و اخيرا في ناس من الحكومة مستعدين يسمعون الشباب و يعطونهم الفرصة ، وايد استانست يوم وصلتني الدعوة و كان فبالي كلام وايد كان ودي اقوله 

من ناحيتهم ما قصروا انهم فكروا بهالشي و خاصة انه اللقاء ماكان رسمي و لا بمكان رسمي و حبيت هالشي 

لكن 


تفاجأت بوايد اشياء يمكن البعض يقول انها مالها علاقة باللقاء بس بالنسبة لي مهمة 

اتوقع الكل قرا الكلام اللي انكتب من قبل انه ابدا البلوقرز ما حصلت لنا فرصة انه نتكلم 

الشغلة الأساسية انه الموضوع اللي يبونه ما كان واضح ؟؟ انا اللي فهمته انه راح يكون النقاش عن التعاون بين البلوقرز و الجهات الحكومية ؟؟ 

واحد من الأشخاص قام يتكلم عن الرخصة التجارية اللي يبي يطلعها !!و الإخوان المذيعين بدعوا كل واحد قام يلقي خطاب !!مع احترامي لهم بس انتوا عندكم برامج تكلموا فيها لو سمحتوا 

للأسف المذيع عبدالله بوفتين دش بموضوع السياسة وواحد من الحضور مادري اذا اهو بلوقر و لا شنو دش بالسياسة بقوة و بالمحاكمات و قام يصارخ !! 

شخصيا اسلوب الصراخ اللي من فترة منتشر عندنا بالكويت يسبب لي ازمة نفسية الصراحة من صرخ الأخ  انا ما قدرت اتحمل و طلعت 

الإعلام و التصوير و التلفزيون ماكان له اي داعي 


يمكن بس حمد قلم اللي تكلم كلام مناسب للفكرة اللي كانوا يبونها 




الحين خل نخلي كل هالشي بصوب  و خل اتكلم عن الشي اللي صج ضيق خلقي 


من فترة و انا اقول انه مشالله الرجل الكويتي يعرف الأتيكيت و الكل قام يعرف هالشي و انه انشالله تغيرت نظرته للمرأة و من هالأشياء 


بس اللي صار ذاك اليوم حسيت انه ماكو فايده و اللي بيقول عني متحيزة خل يقول بس الصراحة احنا بنات الكويت نعرف اللباقة و نعرف نتصرف و نحترم المكان اللي احنا فيه 



من وصلت كنا تقريبا اربع او خمس بنات 

ظلينا واقفين 

و الشباب اقصد 
(الرجال)

كلهم قاعدين !!مافي اي واحد فيهم فكر انه يقوم و يقول تفضلوا!!! او يساعد و اهو يشوفنا لما سحبنا طاولة و كلمنا الستاف اللي بالكافيه انهم اييبون لنا كراسي و قعدنا نصفهم تكرمون صوب الحمام 

و مرتزين و معطينا ظهورهم و لا تحركوا و لا في اي احترام !!!!الصراحة عيب 

لو موالوزير  محمد العبدالله قالهم وسعوا شوي 


و الشغله اللي حرتني و ضايقت وايد من البنات 

ما فكروا انه المكان مسكر و قعدوا يدخنون !!عيب ترى و الله عيب ؟؟ 

معناته انهم اذا متزوجين او عندهم عيال عادي يدخنون جدامهم !!و اللي عاد حرني اكثر واحد من الوزرا ولع زقارته !!!!و الله انا ما الوم الناس اللي ما تطبق قانون التدخين بلأماكن المغلقة و خاصة الأجانب لأن اهل الديرة مة محترمين القوانين 


المهم انا طلعت و مادري شنو اللي صار بس بعدين وصلني ايميل انهم يعتذرون عن اللي صار و انشالله في لقاء ثاني 

اتمنى اللقاء الثاني بعد تراعون فيه موعد الصلاة 
لأن اذن المغرب و مافي مكان للصلاة 

هذي بعض الصور الي قدرت اصورها 




1 comment:

almubarkia blog said...

الصراحه انا واحد من البلوقرز الي انحرجت من موقفنا كمدونين بالاجتماع ماكان لنا مطالب او محد من المدونين تكلم

لطالما ان الاجتماع سياسي بحت جان خلوه مفتووح حق كل الناس و الاعلامين السياسين بس

خصوصا ان هذا الاجتماع كان فقط مقتصر لطرح الهموم و المشكلات كنا بس نسمع مشاكل ماكان فيه حلول