تسكنين مع اهل الزوج ؟؟؟

اتوقع الناس اللي متابعين بلوقي من زمان يدرون اني ساكنة مع اهل ج ،طبعا كل المخطوبين و اللي ناوين يتزوجون 

اول موضوع يناقشونه هو موضوع السكن ، و هالشي من اهم المواضيع اللي لازم يتكلمون فيها من البداية و يتفقون عليها 

اغلب العرايس يفضلون سكن بروحهم بعيد عن اهل الزوج و هالشي طبعا من حق البنت انها تطلبه لأنها تكون محتاجه خصوصية 

انا الحمدالله صار لي معاهم تقريبا اكثر من 6 سنوات و طبعا كل وحده لها تجربة مختلفة 

لو احد يسالني لو يرجع فيج الوقت تسكنين معاهم و لا بروحج ، طبعا اختار اني اسكن معاهم 

اكيد بالبداية التأقلم صعب وايد ،ما كنت متقبلة المنطقة و فراق بيت الأهل ترى صعب على البنت يبيلها فترة على ما تحس انها الحين فبيتها 

بس الحمدالله كل شي مشى مثل ما ابي 

بس لازم اكون واضحة ، انج تقعدين مع اهل الزوج او انك تطلب منها انها تقعد فبيت اهلك ، هالشي لازم تتوفر فيه شروط مهمة على حسب احتياج كل وحده 

مثلا الحمدالله خالتي ام ج مو من النواع اللي تسالني وين رايحة ووين راده ، انا هالشي وايد مهم بالنسبة لي لأني وايد اطلع و الشخص اللي من حقه انه يدري عن طلعتي و دخلتي اهو ج 

انا عندي جو خاص فيني مثلا موعد نومي او قعدتي بالصاله ،البرامج اللي اشوفها التلفزيون وشغلي بالبلوق  يعني ما اقدر ارتبط اني لازم انزل و اقعد بالصالة اللي تحت و الحمدالله هالشي متوفر لي لأن خالتي بعد تحب الخصوصية 

في عوايل انه لازم زوجات العيال كل يوم ينزلون يقعدون بالصالة ، انا هالشي ما اقدر عليه 

الغدا كنت اتغدى معاهم و بالعكس هالشي اريح لي لأني ما اطبخ و ما عندي مانع حتى لو اقعد بحجابي لأن اخو زوجي موجود 

لكن اذا يوم مالي خلق او ابي آكل فوق كان الغدا يوصلني لشقتي 

انا بالنسبة لي من حق خالتي انها تتغدا مع ولدها و ما عندي مانع كلش انه كل يوم يتغدى مع امه لأن انا شكو اقوله لا تتغدى معاها 

حتى لو انا ما كنت موجوده معاهم 

مرات تصدف زوارة خالات ج يوم الجمعة بالبيت عندنا انا شخصيا احس انا مو لازم اكون دايما موجوده مو عشان اني ساكنة معاهم بالبيت اني لازم التزم لأن يوم الإجازة يوم خاص فيني ما احب التزم فيه 

يعني بشكل عام خصوصيتي موجوده و هذه الشي اللي خلاني اقعد معاهم و مرتاحة و ج بعد مقدر هالشي و مخليني على راحتي لأني بالمقابل مو قاعده امنعهانه ينزل يقعد و ياكل مع امه 

انا بروحي بالبيت ماكو احد معاي و هالشي يمكن ساعد اني احصل خصوصية  و راحة مثل ما ابي 

يمكن البيوت اللي تكون فيها اكثر من وحده الوضع يختلف او اذا كانوا خوات الزوج موجودين 

بس من سنة اخو زوجي تزوج و سكن معانا بنفس البيت ، كنت متوقعة انه ممكن تكون علاقتي مع زوجته زينه يعني نطلع مع بعض  و تكون علاقة طبيعية لكن للأسف ما قدرنا نتوافق يمكن لأن اطباعنا مختلفة و اهتماماتنا غير 

حرام و لازم اقول الصج ما صار بيني و بينها هواش لكن ما صار في تقبل و هالشي طبعا يضايق 

كان في مشاكل انها ما تبي تاكل تحت و كانوا يبون يطبخون و اذا طبخو فوق ريحة الطباخ تدخل غرفة نومي و هالشي سبب لنا ازعاج احنا الثنتين ، من حقها انها تطبخ  و من حقي انه ريحة غرفة نومي ما تكون ريحة مطبخ  المهم م صار اي اتفاق و طلعوا سكنوا بره البيت 

شفتوا شلون انه السكن مع اهل الزوج يعتمد على اولويات كل وحده و اهتمامها مثلا انا مو مهم عندي الطبخ و مستعده اضحي فيه و ما اسكن بأجار لأن اهتمامي الأول الخصوصية 

وحده غيري لأ هالموضوع مهم عندها و اذا ما توفرت لها الظروف تفضل انها تسكن بروحها 

انا نظرتي انا المبالغ اللي بتنقط على الأجار احنا اولى فيها و نستانس فيها 

انا وحده وناستي مع زوجي اهيا رقم 1 قبل كل شي 

بالبداية كل وحده لازم تعرف طبعها و شنو تبي و تكون صريحة بهالشي من الخطبة 

الحدود مهمة وايد اذا كنتي تبين تسكنين معاهم ، لا تبالغين بالحب و تقطين عمرج وايد بالبداية عشان تبين تبهرين زوجج لأن اكيد بعد فترة راح تتعبين و بعدين راح يقولون شفيها متغيرة ؟ خلج طبيعية من البداية حطي حدودج ، احترمي امه و ابوه ، و سلمي عليهم اذا شفتيهم بالطلعة و الدخله 

لا تتدخلين بحياتهم لأن مالج شغل !!!صج و الله مالج شغل شنو يلبسون ووين ياكلون و شحقه جذي و شحقه هالشي 

انتي داشة عليهم و هذا بيتهم 

و اكرر 

الحدود مهمة لأنها راح تريحج و راح تريحهم 

طبعا امهاتنا ما يعجبهم هالكلام امي وايد تزفني على هالشي 

لكن جيلنا غير و حياتنا غير و هالشي مريحني انا و زوجي 

و الحمدالله مافي اي مشاكل بينا