سنة جديدة بحياة زوجية سعيدة

هذا الموضوع الأزلي اللي ما ينتهي 

يعيشون الأزواج في رحلة يدورون السعادة 

و مرات واحد من الطرفين بس اهو اللي قاعد يتعب عشان تظل هالسعادة بينهم 

دشينا بسنة يديدة ، و ما في اي مانع انه نغير و نحاول نتغير 

اول شي لازم نفهم ماكو اي شخصين حياتهم تشبه اي ازواج ثانين ، كا اثنين لهم نظام حياة غير 

لكن اكو اساسيات احس لازم  تكون موجودة بكل علاقة زوجية 

خلكم قراب من الله 

والله العظيم انكم تخافون ربكم في بعض قبل لا تخافون من كلام الناس او تخافون من بعض ، راح تحسون براحة نفسية كبيرة 

و الله سبحانه راح يبارك لكم حياتكم 

الصراحة و الوضوح 

خلكم واضحين مع بعض و صريحين بكل المواضيع 

لا تسكتون و تقولون الحياة تعاسة !!شلون الطرف الثاني يدري ؟ اذا الأول خاش بقلبه و ساكت 

مثلا في نصيحة وايد ينصحون فيها لكن انا ما احبها 

انه الريال اذا تبين منه شي لازم تلفين و تدورين و تقولين قصة و حالة و تحسسيسنه انه فكرته و مادري شنو !! ليش ؟؟ خلج واضحة و صريحة و قولي له اللي تبين و بيني له وجهة نظرج ايد باسلوب و كلام حلو من قلبج لا تتصنعين و كوني طبيعية 

ترى ما راح يقص راسج ولا راح يذبحج 

و الريال بعد تقعد تسكت و تحط بقلبك و بعدين تقول الزواج مو شي و الزوجة بعد الزواج تتغير و انا مو مستانس و تبرر حق نفسك اعوذ بالله انك تخون و يصير عندك صديقة لأن حضرتك مقتنع انه زوجتك ما تصلح لك !!الشي اللي تبيه قوله لها 

مرات بعض البنات ما عندها سرعة بديهة انه تفهم الريال شنو يبي 

و المجتمع و الصورة المرسومة للمرأة ما قامت تنفع وايد بوقتنا الحين 

قول لها شنو اللي تبيه لا تخليها جذي و تقول احنا مو متفاهمين 

راح اتكلم من ناحية الشكل لأن الريال مخلوق بصري و ريايل الكويت من يتزوجون فجأة بس يحنون و يعيبون على الأشكال 

مثلا بعد الزواج في بنات فجأة تتغير و تغير ستايلها و تعطيكم مود انا الكبيرة المتزوجة و تلبس ستايل وايد رزه 

يمكن في بعض الريايل يعجبه هالشي بس البعض ما يعجبه و غالبية الشباب الحين ما يعجبهم 

انت اذا ما عجبك هالشي و تبيها ستايل عملي و ناعم 

تحجى !! لا تسكت و مسكينة البنت تختب و انت ما يعجبك و من تشوف وحده على الستايل اللي تبيه يزوغ قلبك !! 

هذا مثال واحد من امثلة وايد 

هالنقطة اقدر اتكلم فيها لي الصبح 

الإحترام و الحب 

وايد مهم ، و هالشيين مرتبطين في بعض وايد 

شنو يفيد الحب بدون احترام ؟؟ تحبها و تموت عليها بس جدام الناس كلامك كه طنازة ؟ و لا تستحي تبين انك تحبها ؟ هذي زوجتك ترى ؟؟ 

و الزوجة بعد وايد رسمية مع الريال على اساس انه احترام انزين و الحب وين راح ؟؟؟ و اسفه مع احترامي للكل الي يقولون هالكلمه 

كل كلمة و الثانية قلتي 

ابونا  و ابونا ؟؟ 

ليش تزرعين براسه الصورة البايخة عن الزواج  انه مسؤلية و واجبات ؟؟ 

و الاحترام بعد انكم تحافظون على بعض 

استغفر الله موضوع الخيانات اللي زايد وايد 

انا اعتبر الخيانة شي انك مو حاط اي اعتبار حق الشريك و ما تحترمه 

استمتعوا مع بعض ، و الزواج شي حلو اذا عشتوه بتفاهم و حبيتوا بعض صج ، اذا صج عايشين مع بعض لأنكم ما تستغنون عن بعض 

لا تكملون اذا قاعد بس عشان عيالك !! ليش تييب عيال من الأساس ؟ 

و لا تعيشون مع بعض لأن المجتمع و الناس حولكم انكم لازم تتزوجون 

لا تتزوج و لا تعيش حياة مزدوجة و تتحسف 

انا بالنسبة لي العمر مرة لازم اعيش الحب صح و لا ما اعيشه 

و نصيحتي حق البنت 

اي حب في عذاب و ضيقة خلق مو حب هذا لأنج عمرج ما راح توصلين للإستقرار

و اكرر الصراحة مهمة 

عساها سنة حلوة عليكم كلكم يا رب 

ملاحظة : لا انا خبيرة و لا دارسة علاقات زوجية و لا شي انا قاعدة اكتب راي و كلام ابي اقوله يمكن يكون صح و يمكن يكون غلط