يقولون .... متحكمة

يحيرني الوضع بالكويت 

احنا الكويتين الناس اللي نحب ندخل نفسنا بكل شي 

و خاصة بينا و بين بعض 

نتدخل و نحكم و نتخيل و بنفس الوقت و لا احد فيا يفكر يطالع نفسه 

من الغلات اللي تواجهني انا شخصيا ، تقييم الناس حق حياتي و تدخلهم بأشياء ما يدرون عنها 

مع اني احب اتكلم عن العلاقات بين المرا و الريال بشكل عام ما اخص الزواج بس هالمرة موضوعي بين المتزوجين 

تعرفون النكته اللي انتشرت قبل فترة انا اذا شافوا اي اثنين مرتاحين مع بعض ، قالوا انه زوجته ساحرته ؟؟؟ انزين ليش مو اهو ساحرها ؟؟ ليش ؟ 

و لما يشيفون اي اثنين حياتهم ماشية بتفاهم و انه البنت ماشية بحياتها و حياتها ناجحة ، قالوا انه متحكمة او انها غيرت الريال !! التغيير بالنسبة لي ضروري من الطرفين بس طبيعة الحياة هذا شي راجع لهم اثنينهم 

احب اوضح شغلة مو عشان الناس و لا عشان اللي يتكلمون عني 

بس ابي ابينها لأن يمكن الناس ما تنتبه 

شخصية الريال القوي ابدا ما كانت بالتحكم بالطلعات و اللبس و الحكرة 

لما تشوفوني البس و اطلع و لي راي و لي كلام وواثقة من نفسي هذا اكيد بمساعدة كبيرة من شخصيو زوجي القوية 

لو كان اهو ضعيف و شخصيته مهزوزة جان منعني من وايد اشياء 

الناس قاعدة تشوف الموضوع من طرفي  و من ناحيتي 

بس الناحية الثانية ما يدرون عنها 

ج لو يقرر انه الحين بيروح يسافر مع ربعه 

لا يمكن اني اقول لأ 

على العكس الريال المريض اللي كل شي نده لا و ما عنده ثقة بنفسه و لا بزوجته مستعد يحرم نفسه من سفره مع ربعه عشان زوجته لا تقوله انها بتطلع مع رفيجاتها 

ج سافر مع ربعه و حضر كونسرت بدبي 

و انا ادري و كان يدز لي صور و انا ادري شنو الوضع بالحفلات 

بس ما اقدر اقوله لأ لأنه ريال و ماخذ قرار 

عكس البعض اللي ممكن يألف على زوجته و يقولها رايح عرس،او اجتماع و اهو يبي يروح الحفلة و يخاف منها 

انزين فهموني من قوي الشخصية ؟ الواضح اللي متفاهم مع زوجته 

و حاطين النقاط على الحروف و لا اللي حياتهم لف و دوران ؟؟ و خطط و اسرار ؟ 

ادري ج يمكن تعصب علي على هالبوست لأنك دايما تقول ما عليج من الناس و لا تردين عليهم 

بس انا كنت محتاجة اتكلم لأن لا مرة و لا مرتين سمعت  كلام 

الحمدالله الله يتمم علي و على كل زوجين بين ثقه و احترام قبل لا يكون بينهم حب