منو الرجل الأناني ؟؟؟

أمس كتبت الموقف بتويتر 

في الخطبة وايد اسئلة ممكن الريال يسالها البنت 

للأسف بعض الريايل ممكن من اسئلته ممكن تكتشفين اذا اهو اناني أو لأ 

مثلا هذا الموقف 

هذا الشخص كان بثاني زيارة حق البنت اللي متقدم لها 

و قاعدين يسولفون 

و هذا الحوار 

الرجل : ابي اقولج شي ، انا مابي تقولين لي كل يوم بروح عند امي او بشوف أمي ترى ما احب جذي 

سكتت البنت شوي و سألته : اذا صار نصيب ، وين راح نسكن ؟؟ 

الرجل : عند اهلي مسوين لي شقة يديدة 

البنت : اها اوكي بس مابي تقولي كل يوم بشوف امي ، ترى ما احب جذي 

الريال انصعق من كلامها !!!و توهق ما قدر يرد لأن الأخ طالب منها نفس الطلب  وكان اناني لأنه ما فكر 

طبعا البنت من طلع قالت حق اهلها انها مو مرتاحة لأن اهلها بالنسبة لها خط أحمر 

البنت تدري ان بالوضع الطبيعي و مع مشاغل الدنيا اصلا مو كل يوم راح تقدر تروح بيتهم و عند امها 

بس لأن طلب منها هالشي !و ما فكر و لاقدر و لا احترم اهلها و اكيد بالمقابل يبيها تحترم اهله بس لما انحط بنفس الموقف انصدم 

عمرها الشروط ما كانت اساس  عشان ينجح الزواج 

اتمنى من الريال لما اي يخطب او يحط اي شرط يحط نفسه اول شي و يشوف اذا هالشي يريحه او لأ 

بالخطبة 

كونوا واضحين و لا تلبسون ثوب مو ثوبكم و لا تتصنعون شخصية مو شخصيتكم 

بالذات البنت للأسف لأن المجتمع يطلب منها انها لازم تكون مستحية و ما تتكلم 

ما تقول اللي تبيه و هالشي راح يخليها تعيش حياة مو حياتها و تقص على نفسها انها راضية 

الرجل الكويتي معروف انه اناني مو الكل طبعا بس هذا الشي اللي معروف عنه 

ودي من جيل الشباب انه يغيرون هالفكرة 

و البنات خلج طبيعية ما اقول طيحي الميانة  و صيري جريئة بس خلج طبيعية 

و قولي اللي تبينه و فهميه الأشياء اللي تحبينها و اللي ما تبين تتنازلين عنها 

مو عيب لأن ممكن ريال ما يتقبل و فيه ريال ثاني يتقبل 

و الله يوفق الجميع