Monday, September 03, 2012

ترى احنا اللي يايبين الهم حق نفسنا

source:tumblr

و انا قاعدة اقرا بالنت جم موضوع مريت على فكرة او موضوع بالضبط ينطبق علينا 
بالكويت ، انه دايما ضيقة خلوقنا  و متمللين و السبب احنا !! 


في جم نقطه تبين شلون احنا اللي يايبين الهم و ضيقة الخلق حق نفسنا 

النقطة الأولى 

يمكن سمعناها وايد و قرينه عنها بوايد كتب 
انه نقول كلم 
(نعم و حاضر ) 

على كل شي مثلا نقبل كل عزيمة و كل طلب و اي احد يسألنا عن خدمة نقول حاضر و انشالله 
و ننسى نفسنا اذا نبي نسوي هالشي و لا لأ !!

النقطة الثانية 

الضغط بالدوام ،وايد ناس ما يعرفون يقولون لأ و الله انا ما اقدر اسوي هالشغل ، او هالشغل مو نفس اختصاصي 
او ما اقدر اسويه الحين !! و طبعا هالشي يخلي بعض الموظفين يقطون شغلهم عليكم 


النقطة الثالثة 

نقعد ننتقد نفسنا على كل شي سويناه و ننسى الجانب الزين فينا طبعا 

النقطة الرابعة 

نقعد نحكم على كل الأمور حتى لو مالنا شغل فيهم 

طبعا هذي لعبتنا احنا الكويت داشين بكل سالفة و نحكم و نعطي اراء و نتهاوش بعد 

النقطة الخامسة 

هالشي وايد ينطبق على الزوجات و الأمهات تبي ترضي الكل امها و عيالها و زوجها و اهل زوجها  و تنسى اهم شخص ممكن اهيا ترضيه 

نفسها 

او الشخص اللي يبي يرضي كل ربعه و يحط ضغط على نفسه 

النقطة السادسة 

تقعد مع ناس حولك كله يشكون و كآبة !! 

انا الصراحة قمت اقول حق الناس اللي جدامي اني ما احب التشكي 

اوكي اذا شخص عنده مشكله و يبي اساعده بالعكس اساعد بس الناس اللي بس يبون يقطون هموم علي انا اسفة خلاص ما اقدر 


النقطة السابعة 

دايما نفكر بان كل شي مو زين راح يصير 
ماكو تفاؤل 
 و اعترف اني وايد افكر جذي 

النقطة الثامنة 

دايما نمحي انجازاتنا !! اذا سوينا شي كبير و زين ما نذكره ؟؟ 
ليش بالعكس لازم اذكره و اكون فخوره فيه حتى لو كان شي صغير 


نصيحتي بلأخير 

لازم الإنسان يحط نفسه قبل الكل في اغلب المواقف 

لا تسوون شي ما تبون تسوونه و لازم تخلوون وقت حق نفسكم 
و الله ما انكر انه هالشي تعلمته من زوجي كان دايما يقولي لا تسوين شي انتي ما تبينه عشان الناس 

و لا تقولون احنا مو سعداء ؟؟ ترى احنا اللي مانعين السعادة عن نفسنا 

No comments: