الخميس العجيب

صباح الخير


امس كان يوم ، و لا في الأحلام كل شي كان غير

من بدايته اني داومت مبجر ، لين خلص


أنا من اكثر من ٣اسابيع انعزمت على حفلة بنات بتاريخ امس الخميس ، يوم الأربعاء دقت علي أمي و قالت لي : ها مروة انشالله تيين معاي العرس باجر !! أنا هني توهقت قلت لها يما أنا معزومة حفلة ، و بعد قلبي حست بصوتي جان تقول خلاص خلاص أنا اروح العرس بروحي


أنا كنت ادري اني ما راح ارتاح و لا استانس بالحفلة لأني كسرت بامي و ظليت بصراع بس قلت لا أمي قالت روحي


أنا فيني هالشي لما أمي تطلب من شي اذا قلت لها يما مشغوله يحوشني تانيب ضمير و اتعب مع انه أمي حبيبتي ما تقول شي بس أنا أتضايق وايد ، المهم رحت الحفلة ما قدرت اقدر اقعد اكثر من ساعة لان أمي حياتي معورة قلبي


دقيت عليها و كانت توها طالعة من البيت ، قلت لها خلاص خلي الدعوة بره جان تقول لا ارجع البيت و ادخل معاج ، طبعا شوارعنا الزحمة على ما وصلت مشرف و خذيتها و دشينا بالزحمة لين وصلنا دار سلوى كانت ١١:١٤ ما رضوا ياخذون سيارتي و نزلت أمي سلمت و اعتذرت من اهل العرس و ركبت معاي و ردينا


ضحكنا وايد أنا معاها انه لا أنا رحت الحفلة و لا أهيا راحت العرس ، مع هاللوية و السواقه بالزحمة والله اني ارتحت بالنهاية لأني رديت و خذيت أمي .

تعلمت درس مهم اني اذا انحطيت بموقف مثل هذا ، الأولوية لازم تكون حق أمي لأني ما راح ارتاح خلاص هذي الحقيقة



الشي الثاني ، ان الحمدالله الله رزقني رجل بمعنى الكلمة ، لان بالأيام العادية ما يرضى انه توني اطلع بال ١٠ بالليل ، بس لانه يدري شكثر أمي مهمه و اهو ما يقدر يوديني قالي روحي معاها و لما ترجعين اخلي احد اييبني عندج و اردج البيت عمره ما منعني عن شي له علاقة بامي الله لا يحرمني منك يا رب



و بس وصلت البيت و نمت و أنا مرتاحة، رضا الام شي لازم نتعب عليه مع انه الام دائماً راضية عن عيالها ، بس احنا لازم نتعب على الشي


الله يقدرني انشالله و تكون أمي راضية علي

- Posted using BlogPress from my iPad