للرجال : السوالف طعمها وياك غير

source:http://www.saidaonline.com/en/newsgfx/couple%20talking3-saidaonline.jpg 

وصلني ايميل من احد متابعين بلوقي يسألني فيه عن موضوع السوالف بين الأزواج و خاصة حديثين الزواج 

موضوع الكلام والسوالف بين الأزواج هو موضوع تطرقوا له وايد في برامج خاصة بالأزواج و الكتب و المجلات ، دايما كنا نلاحظ المشكله الأزلية من الزوجات انه يشكون من ازواجهم (صنم -ما يتكلم -كله ساكت -ما اسمع صوته ) عشان جذي انا تحمست وايد لما وصلني هالإيميل من الزوج لأن بالنسبة لي هذا بسبب زيادة الوعي بين الشباب و البنات حول الزواج .

من وجهة نظري انا ، الموضوع كبير و مهم وايد ،انا كتبت باكثر من بوست من قبل عن اهمية مرحلة الخطبة فيها ممكن الواحد يحدد اختياراته و الصفات اللي وده تكون بشريك حياته .

للأسف دايما التركيز يكون على اشياء اساسية ، اهيا مهمة وايد لكن في بعض الشغلات الصغيره اللي اقدر اعتبرها اساسية ، و منها موضوع الحوار .

 بالنسبة لي كان اختياري معتمد على اني لازم اقدر اتزوج شخص اقدر اسولف معاه ، و مو بالضرورة ترى انه يكون نفس المستوى التعليمي و لا نفس الإهتمامات !!يمكن في ناس تكونون مختلفن معاهم بوايد جوانب لكن تندمجون مع بعض ، و ناس تكونون نفس  ، و
الشهادة و التخصص لكن لا يمكن يكون بينكم اي حوار

و انا وحدة قرقة لوووول لازم اطلع سوالف و اقرق مع انه ج سبحان الله هادي بس مع التفاهم كل شي يصير حلو  

ليش السوالف و الحوارات مهمة ؟؟ 

لأن بعد 35 سنة زواج ، الجمال بيتغير و الشباب و الصحة بتروح و ما راح يبقى الا انتو الأثنين مع بعض و ماكو بينكم الا الحوار . 

هذا باختصار اول جزء للموضوع اللي اهو موضوع الخطبة 

خل اتكلم على الناس اللي خلاص تزوجوا  و يحسون انه اذا قعدوا مع بعض ماكو سوالف 

وايد عوامل  ممكن تأثر ، مرات في بنات يستحون ما تدري شنو تقول و شنو تتكلم ، السبب ممكن يكون بشكل كبير تأثيرالكلام و النصايح اللي قبل الزواج  مثلا لا تتكلمين وايد و لا تضحكين بالطريقة الفلانية و لا تسولفين هالأنواع من السوالف  طبعا هذا مثال  

هني  الدور على الرجل المتفهم و مثل الأخ اللي سألني السؤال احس انه جدا رجل متفهم الله يهنيه و يسعده 

اذا تبي الشي  ، لازم انت تبدي فيه  ، سولف معاها عن يومك شسويت و شصار لك شنو فكرت و شنو قريت

اول شي بس حبيت اشكره على ثقته فيني و هالإيميل طبعا حسسني بالمسؤلية اللي علي ، احب اوضح اني مو خبيرة و لا متخصصة  ، و كل شي انا اكتبه بالبلوق هو عبارة عن تجربتي الشخصية و تجارب الناس اللي محيطين فيني . 

 ممكن كلامي يكون صح و يمكن ما يتوافق مع وايد ناس لأن كل انسان له بيئة خاصة فيه بس عندي بعض النصايح بشكل عام :

رقم 1

خل غرفة نومك بدون تلفزيون  : اغلب غرف النوم يحرصون المتزوجين انه يكون فيها تلفزيون عشان يشوفون قبل لا ينامون
انا شخصيا من معارضين هالشي ,التلفزيون مكانه بغرفة المعيشة و بدون تلفزيون راح يصير لكم مجال انكم تسولفون قبل النوم


رقم 2

خل يكون عندك آيباد اي مو بس آيفون ، بالفترة اللي تكون حق السوالف قعدوا يم بعض و دشوا سايتات و بلوقات و تنقاشوا شوي شوي ممكن تعرف اهتمامتها تقدر تقولها مثلا و الله  ابي  ادور بالنت حق اي موضوع خلها تدوره لك و اذا لقته قولها خلاص بالليل لما نقعد مع بعض نشوفه

رقم 3

انا من الناس اأيد البنت انه تكون عندها صداقات و طلعات عشان لما ترجع  لك البيت في مواضيع متنوعه تسولفون فيها

رقم 4

 ، بين لها انك ممكن تسمعها حتى لو تكلمت بموضوع بناتي لا تحسسها انه الموضوع سخيف و بين اهتمامك مثلا : انها تكلمت عن صبغ اظافر و نقشات و سوالف بنات لا تدقرها بعد جم يوم اسألها عن شي يتعلق بنفس الموضوع و انشالله البنت راح تبدع معاك بالسوالف


رقم5 و اهو المهم


اي شعور تحس فيه ، قوله ...البنت تحب تسمع هالكلام  ،ولهت عليها لا تدق عليها و تقولها ولهان لما تكون قاعد معاها قولها انا اليوم ولهت عليج وايد  و طبعا قولها انك تحبها

البنت راح تثق فيك و راح تتكلم


نرجع حق مواضيع السوالف اليومية

يمكن البعض يحس انه الحياة ممكن تصير روتينية

لعبوا مع بعض ، نيتندو وي ، بلاي ستيشن

 او اذا ما تحب اهيا هالألعاب ما فيها شي تلعبون مونوبولي

و خل انه هالقعده سبشل يعني شغلوا اغاني بللآيبود و طلبوا عشا و لعبو و ضحكوا و خلها تفوز عليك و فوز عليها بعدين

حسسها انك رفيجها مو زوج و انشالله البنت راح تنطلق معاك  و خل هالشي يستمرحتى اذا  انشالله الله رزقكم  عيال

طلع  صورك و انت صغير و اقعد معاها و اضحك و سولف و تحداها انها توريك صورها المرة الياية (هالموضوع اينن)و راح يصير ضحك

تكلم معاها عن الأحداث اللي قاعد تصير ،مشكله بعض الريايل ما يحسس المرأة بالثقة انها تعطي رايها بأي موضوع سياسي عشان جذي راح تلاقيها تفضل انها تسكت

انشالله  اكون قدرت اني افيدك و افيدكم انا مركزة هالمرة على الريال لأنه الشخص اللي دز لي الرساله اهو الزوج


و الله يوفقك و يهنيك على تفكيرك الراقي


الزواج عمره ما كان هم او نهاية حياة الوناسة بس للأسف الناس اهما اللي غيروا هالفكرة ، لو كل زوج فكر انه يبي يستانس معه شريكة حياته و عاشوا مع بعض كأصدقاء جان ما سمعنا  سوالف انه  وايد متزوجين عندهم صديقات

دايما انصح : تزوج الإنسانة اللي تحس انه ممكن تكون صديقتك

و تزوجي الشخص اللي تقدرين تاخذين راحتج معاه و تكونين على طبيعتج


 و الله يوفق الجميع