بوست كان مفروض انشره شهر 1 : تجربة مريت فيها

واااي ودي ودي اتكلم و اتحلطم على راحتي :) بس ممنوع

في موضوع فبالي من زمان ، اهو عن تجربة مريت فيها و ممكن اي وحده تمر فيها ، كنت قاعده اتكلم مع وحده و اهيا شجعتني و قالت لي كتبي شنو اللي حسيتي فيه عشان نحس و تحسين انه الشعور اللي ياج شعور طبيعي .

يمكن هالبوست يفيد اي وحده لو 10%انا كنت اتمنى لو اي شخص كلمني عن هالموضوع بصراحة بدون ديكور .

و انا اليوم راح اتكلم بصراحة 

انا ظليت فترة 5 سنين و انا ال(كنة) الوحيدة في البيت ،يعني زوجة الولد سوري لازم اوضح لأن الكتابة مرات ما تنفهم ،

ماكو غيري بالبيت و الحمدالله الأمور مستتبة و ماكو اي مشاكل الحمدالله ،اكيد بالبداية بعض المشاكل البسيطة تصير و هالشي نفسي بسبب تغيير البيئة و الإنتقال حق مكان يديد ، لين وصلني الخبر انه اخو زوجي راح يتزوج

اقولها و بكل صراحة و راح اقول مشاعري الحقيقية ،طبعا البنات راح يفهمون الشعور صح ؟؟؟ وايد فرحت له و استانست و بنفس الوقت ياني شعور غريب من مختلف المشاعر ، شلون شكلها ووين تدرس شنو ستايلها و اسئلة وايد دشت فبالي

كنت اقول حق نفسي الحمدالله انا واثقة من نفسي ليش جذي قاعدة افكر ؟؟  تالي فهمت الموضوع

قعدت افكر اي انا كبيرة و اهيا اصغر مني بوايد وصلني خبر انها طويلة و ضعيفة جان اتوفى لووول

تعبت تعبت تبعت من التفكير و الموضوع ما يستاهل بس انا واحده ما اقدر اخش مشاعري ما اقدر ، للأسف بهالفترة ما كان احد فاهم شنو اللي فيني ، امي لما اكلمها تقولي لا انشالله تصيرون ربع ، يما فهميني انا ما اقولج اني ابي اتهاوش مع البنية انا ابي اقول شعوري بس ابي اتكلم

الوحيدين اللي كنت اقدر اقول الصج جدامهم رفيجاتي و كانوا معاي على الخط ، ج ما قدر يستوعب الشعور لأنه ريال مهما يكون نظرته حق الأمور مختلفة 

الشعور ما كان شعور غيرة و لا كره و لاخوف مادري كان احساس بالقلق ، يمكن انا كنت مبالغة شوي

بس هذه شعور طبيعي ممكن تمر فيه اي بنت ، ما هديت الا لما شفت البنية يوم رحنا نودي الدزة و ما قصرت خالتي انها خذتني معاها .

يوم الملجة من كثر ما كنت افكر و ابي شكلي يكون وايد حلو اختربت تسريحتي و رحت صالون ثاني و سويت تسريحة ثانية و الحمدالله كان شكلي وايد اينن .

كنت احس نظرات استغراب من امي و اختي اني ليش الا ابي  اصير وايد حلوة حق الملجة ، اهلا و سهلا بالمجتمع الكويتي

يطالعون و يقارنون ، انا مو شرط اي احد يقول عني احلى او اهيا احلى ، المهم ان شكلي حلو .

سبحان الله  كل وحده فينا شكل مختلف عن الثاني و ستايل غير عن الثاي عشان جذي مافي ابد اي مجال للمقارنة لأن كل وحده غير عن الثانية .

الحين اللي ابي اقوله اي وحده ببتزوج و بتدخل على عايلة عندهم مرت اخو قبلج ، لا تستنكرين بعض تصرفات

مرت الأخو ، ترى ما تكرهج و لا شي بس الشعور ترى صعب و ما ينوصف