قررت اني لازم اوضح للكل .....

طبعا من فترة انا مقررة من كيفي انه دوامي 10 الصبح !! ادري مبدعة و ميخالف خل يخصمون من الراتب عشان يصير معاشي حلال . انا قررت اصيف و طلعت اليوم و لا الجو بارد و مع الغبار الأبيض الوضع شي . 

من فترة في موضوع كنت قاعدة افكر فيه و سألوني عنه وايد و قررت اني لازم اكتب عنه و اوضح حق الناس اللي يقرون بلوقي ، في ناس سألوني شنو علاقة اسم البلوق باللمواضيع اللي قاعده تكتبينها و ليش ما تغيرينه و ليش ما تغيرين حتى الفكرة و التصميم .

اساسا انا بديت البلوق و كلش ما كان عندي فكرة شنو بيصير او اني راح اكمل اكتب فيه مشالله 5سنين  ، و ما كنت اصلا متوقعة ان الناس راح تقرا لي او راح يعرفوني ، كنت اكتب تجربتي بالحياة اليديدة اللي دخلتها و حياتي كأمرأة متزوجة , تجاربي و مشاعري الصجية . اللي كان يقولي انه البوستات بأول سنتين كانت احلى ، صج  كانت احلى و عفوية ما كان احد يعرف منو انا و كنت ماخذه راحتي اكثر . هذا سبب من الأسباب .

من الأسباب الثانية ، هذا البلوق اهو حياتي بعد الزواج ،اول سنتين محاولات التأقلم مع الحياة اليديدة بالظبط كانت بوستاتي نفس الشي تعطي ايحاء انه ماكو استقرار بالمشاعر ، السنة الثالثة  كانت فترة من الفترات الصعبة و اهيا فتره علاج و صراع بيني و بين نفسي و هالشي واضح بكتابتي .

و السنة الرابعة ، سنة بداية الهدوء  و السلام مع النفس و معرفة نفسي اكثر و اكثر

  السنة الخامس و الحين انشالله انا داشة بالسادسة الحمدالله الإستقرار التام و عرفت شنو اهتمامتي و حياتي ماشية الحمدالله احسن من اللي كنت اتخيله

يعني ابي اوضح انا ما تغيرت و البلوق ما تغير و اسم البلوق مرتبط فيني و بحياني لأنه هذي اهيا حياتي الحين ، و اهم شي اني ابين حق البنات انه ممكن الحياة الزوجية ما توقفج عن طموحج و اهتماماتج حتى لو كانت بسيطة 

This is my life after marriage , this me now :)

بلوقي اعتبره حياتي المصغرة و يعكس صورتي الصجية  حق الناس اللي يقرون لي :)