مهم حق كل اللي ما تزوجوا ، سوالف الخطبة

كنت قاعدة افكر امس بموضوع ، انا اتوقع من وجه نظري انه مهم . احس بوقتنا الحين مع كل التطور التكنولوجي اللي حاصل ازم بعض الأمور بموضوع الخطبة و الزواج تتغير و اللي اقصده اهوا شنو المعلومات اللي ممكن يقولونها حق بعض في اول لقاء . انا من زمان من مؤيدين انه اللقاء الأول في الخطبة لازم يصير في توضيح حق اغلب الأمور الأساسية ، للأسف لي الحين بعض العوايل يقولون حق البنت لا تتكلمين و خلج ساكته و لا تسألين مع انه شرعا من حقها .

أغلب المختصين في مواضيع العلاقات الزوجية بينوا هالشي و انه لازم الطرفين يكونون مجهزين الأسئلة اللي يبون يسألونها و يقولون الأشياء اللي يعتقدون انه الطرف الثاني لازم يعرفها ، لا تقولون شدعوة و اهو مو امتحان ، بالعكس توضيح الأمور من البداية و الإبتعاد عن التمثيل وايد راح يساهم انه يكون الزواج هذا ناجح او لأ .

يمكن تفكرون شنو ممكن نسأل او نقول ؟؟ انا اقول حتى الأشياء  البسيطة لازم تنقال عشان تعرفون بعض انه ممكن تتقبلون بعض او لأ و ممكن تتناقشون . مثلا لازم تقول لها انك تحب انك تروح الشاليه مع ربعك او انك تحب البر بالشتا ، و اهيا لازم تقول اذا اهيا راعية مواجيب يعني مثلا تحب تحضر عروس و استقبالات  و من هلأشياء البسيطة ، مثلا تبلغه اني و الله احب ان يكون لي 3 ساعات بالشهر اروح فيهم السبا و غيره لا تقولين مو مهم لأن صج في نوع من الريايل ما يحبون و في غيرهم بالعكس ما عنده مانع و يشجع انه زوجته يكون لها وقت خاص فيها تهتم بنفسها .

الموضوع الأساسي اللي ابي اتكلم فيه ، انه اهتمامات البنات وقتنا الحين تغيرت ، مثال وايد بنات مشالله نشوفوهم عندهم بلوقات ناجحة و نقدر نعتبرها هواية لهم او بزنس  ، و بعضهم مو متزوجات من وجهة نظري انها لازم تبين حق الشخص اللي خاطب انه البلوق شي مهم بحياتها و نصيحه ترى مهم ، انا قاعده اشوف نفسي شكثر مهم بالنسبة و يعطيني طاقة حلوة و تتعدل نفسيتي .

امس سألت هالسؤال في تويترحق الشباب : تعتقد من المهم انه تقول لك في وقت الخطبة انه عندها بلوق ولها اهتمامات و نشاطات في هالمجال ؟ و هل ممكن انه يأثر على قرارك ؟

و حق البنات : اذا قالج انه يبيج و شاريج بس ما يبيج تكملين في موضوع البلوق و بلوقج ناجح و انتي ناجحة هل ممكن يأثر هالشي على قرارج ؟؟ ترفضين ؟؟ و لا توافقين ؟؟ ودي اعرف رايكم