Sunday, January 08, 2012

و يوم الأحد و جم مطعم و فلم

hatha el post kan lazm asweela publish elyoom el9b7 bas wayed 9ar 3ndee looyah o now nazalt el pic



وصلنا يوم الأحد ، بداية اسبوع يديده و انشالله نشاط :)


هالأيام الجو قاتلني ، بس ابي اطلع احس مابي اضيع اي فرصة

هالويكند كان ويكيند جميل وحلو الحمدالله ما بين ويارات الأهل و طلعة رفيجاتي يوم السبت ، طلعة يوم السبت بالنسبة لي مقدسة احس ما اقدر اطوفها الا لظروف قوية وايد تكلمت عن علاقات الصديقات من قبل و ارد اكرر هالشي ،علاقتي مع صديقاتي وايد وايد مهمة 

من جم يوم صديقتي العزيزة (ام عبودي)دريت انها موجوده بالكويت ، اهيا تدرس بمانشستر و ما صدقت انها موجوده لأني وايد ولهانة عليها قررت اني استأذن و اطلع من الدوام عشان اشوفها ، و رحنا 

Milk


  
من كثر ما سمعت عنه و تقريبا كل البلوقات كاتبين عنه و مادحينه وايد ، بصراحة مع احترامي حق الكل بس كلش ما عجبني
مو بس انا حتى رفيجاتي ، حليب الزعفران كلش مو حلو ، الوافلز طعمه استغفر الله ، الساندويتش اقل من عادية البانكيك ما كليتها بس من شكلها ما جذبتني . رفيجتي طلبت حليب كاكاو و موحلو. يمكن لازم اجربه مره ثانية عشان اقدر اعطي راي 100%بس اشوه اني ما رحت مع ج لأني اذيته ابي اروح جان تفشلت

مادري شكو اتفشل لما اكون انا مختارة المطعم و يطلع مو حلو !!!اتفشل و اتضايق انزين انا شكو ؟ مو مطعمي مثلا ؟؟؟؟


Ayami Breakfast

المهم بالويكيند كان حايشني تانيب ضمير و امي قالت لي انها مشتهية تطلع و من زمان ما طلعنا ،جان اقولها خلاص السبت الصبح نتريق ، وايد من صديقات تويتر اقترحوا لي اماكن وايد
المهم قررنا انا معاها نروح أيامي بمارينا كريسنت ، الجو وايد حلو و على صوت فيروز طلبنا احلى ريوق و حليب زعفران اللي صج عجيب ، احس من زمان ما طلعت معاها و اهيا اصلا حبيبتي كله مشغوله و لاهية و الحين بعد اهيا لوية مع الإنتخابات



الحمدالله استانست معاها و ارضيت ضميري عشان اطلع مع رفيجاتي و انا مرتاحة ، المهم حجزنا فلم شارلوك هولمز ، و الله حلو بس عندي الجزء الأول وايد احلى ، انا عموما ما احب لما يكون الفلم اجزاء ، حلوة القصة بس الجزء الأول عجبني اكثر


و بس كان الويكيند عبارة عن طلعات حلوة و استانست مع الصديقات

كان في موضوع مضايقني انه وحده من الصديقات متغيرة علينا من فترة و مادري ولهانة عليها وايد و على سوالفها بس انشالله يارب ترجع لنا مثل اول و تفكر بنفسها انه حياتها و نفسها لها عليها حق اكثر من اي شخص ثاني

انا ما احكم على الناس و حياة الناس بس يضيق خلقي لما احس و يبين على الإنسانة اللي جدامي انه مو سعيده

1 comment:

RuBY_GLooM said...

7aleeb el za3faraan was a big #fail ,,, ana ba3ad ma 3ajanbi ,, a7la shy feeh decoratah