تجربة جديده في حياة newq8bride

مثل ما كتبت من قبل ، اني الحين مو انا العروس الوحيده ، اخو زوجي الحمدالله تزوج ، و العروس اليديده راح تسكن معانا بنفس البيت.

اللي يعرفوني و اللي حولي كانوا يدرون شكثر كنت متوترة ، تجربة يديدة  راح ادخلها و دور يديد علي ، مرت الحما .

للأسف الإعلام و المجتمع رسموا لنا صورة وحده حق هذه العلاقه : غيره ، هواش و كل وحده تحر الثانية  ، حتى بالتراث الكويتي ، قبل جم يوم سمعت بلإذاعة عن يعض الغناوي اللي كانوا يغنونها حريم الحما حق بعض كل وحده فيهم تحر الثانية بإعيالها

مادري ليش بس هالأفكار خرعتني وايد ، و انا الحمدالله و الشكر بعد مو ناقصة اقعد اتخيل و اصدق شنو بيصير و انا وحده اعترف اني وايد غيورة ، و احتر !! اكثر واحد يعرف هالشعور فيني ج و متحملني .

الحمدالله الحمدالله لما التقيت فيها ، وايد وايد تغيرت النظره فبالي ، البنية تينن و نفسها حلوة و طيبة ، اكيد اهيا بالمقابل كانت وايد متخوفه ، اتوقع هالشي ، اهيا صغيره و سمعت عندها مرت حما ، يمكن دعله و يمكن لأ

طبعا العروسة اليديدة تحب الطباخ و هالشي مختلف عني لأني احب الأكل و المطاعم و هالشي يخلينا نكمل بعض : ) اتمنى بس انه بشقتهم يكون في شفاط بالمطبخ ، لأن على ما اعتقد تعرفون علاقتي بريحه الطباخ لووول (دعلة)  

طبعا انا من مؤيدين انه مثل هالعلاقات تكون فيها حدود عشان كل الأطراف  يرتاحون و انا هذي طبيعة علاقتي مع اغلب الناس احب ان تكون في حدود بالعلاقات  مو عشان شي و اني انا خايفة منهم , بالعكس لأن انا انسانه مزاجية يمكن بيوم اتكلم عادي ثاني يوم مالي خلق احد

الله يوفق المعاريس اليدد و يهنيهم  يا رب  انشالله يا رب يبعد عنا احنا الثنتين المشاكل و نكون حلوين و على قلب

و بالنهاية

Newq8bride will remain a New  bride forever