صداقتكم قبل و بعد الزواج ؟؟ شلون صارت ؟

 

Tumblr.com

في هذا الموضوع انا مو قاعده احكم على احد و لا اني احط قوانين ، انا اتكلم عن رأي الشخصي و نظرتي الشخصية للموضوع و

مستعده لتقبل الرأي الآخر

امس صار نقاش في تويتر لما كتبت تويت عن الصداقة و اهميتها ، و شلون الصديقه الصح ما تتغير على رفيجاتها بعد الزواج ، يمكن هالموضوع ويد تكلمت فيه من قبل بس ودي اعرف الآراء بعد و ما امل اتكلم منه يمكن وحده او واحد يستيفدون منه .  و اللي خلاني اكتب عنه انه وايد بنات  اشتكو لي من تصرفات رفيجاتهم .

أغلب البنات يشتكون من تغيير رفيجاتهم بعد الزواج ، طبعا انا هني ما اتكلم عن بنات اعمارهم 18 – 20  ، انا اتكلم عن طريق تجربه فكلامي عن البنات اللي تزوجوا بعد ال 25,اللي تكون انسانه ناضجة و موظفه و لها كيان و دور بالمجتمع .

يحز بخاطري هذا التصرف ، من تتزوج تعطيج هذي السحبة اللي فجأه 6 شهور ما تدري عنج !!! انا بس ودي دي اعرف السبب اللي يخلي الوحده ما ترد حتى على الموبايل !! مو معقوله انتي 24 ساعه لازقه فيه ؟؟

اسفة على هالكلمة بس تكرمون و انتي داشة الحمام 5 دقايق دزي مسجات حق رفيجاتج سلمي عليهم .... بس

انا بالنسبة لي الصديقه الحقيقة تبين بالظبط في هذي المواقف

و اكرر انا ما اتكلم عن بنات صغار انا اتكلم عن بنات كبار قادرين انهم ياخذون قرارات

طبعا بتقولون في ريايل ما يرضون و مادري شنو ، انا اقولج  مو شرط تطلعين مع البنات ، مكالمة وحده او مسج  كافي . نصيحه و الله حق اي وحده مقبله للزواج ، لا تصدين عن رفيجاتج لا تصدين ، زوجج ما راح يهد ربعه لأن ما في داعي يهدهم الإنسان الطبيعي اهو اللي يكون عنده صداقات يا حبيبتي لا تخسرين رفيجاتج لأن بعد سنييييين راح تحسين فيها . لما تكون بروحج

اليوم الصبح تناقشت مع وحده من صديقاتي انه في بعض صديقاتها اللي مو متزوجات اهما اللي وخروا عنها و حطوا حواجز ، هالشي بعد اعتبره غلط لأن البنت راح تكون محتاجة لكم اكثر وقت الحين .

يمكن في شغله مادري انا غلط او صح فيها , لما اطلع مع رفيجاتي و نكون مكس متزوجات و مو متزوجات افضل انه الحوار ما يكون في كلام وايد عن الزوج او اليهال او الخدم

انا شخصيا اذا تحول الحوار عن خدم و يهال و مدارس يهال يضيق خلقي بالطلعه احس فجأة اني كبرت 20 سنة و انا الهدف من طلعتي ان استانس مع رفيجاتي

اذا وحده عندها مشكله و تبي نساعدها هذا موضوع ثاني ، بالعكس راح افتح لها قلبي بس انه تتحول الطلعة بس عن هالموضوع ؟؟

لازم يصير في تقدير انه في بنات مو متزوجات ما يهمهم  هالموضوع .

ودي اعرف بالنسبة حق الريايل ، عندكم هالشي يصير و لا لأ ؟؟

و في شغله ودي اقولها : قوة شخصيتك كزوج تبين لما تكون انته قادر انك تتقبل زوجتك و رفيجاتها و تخليها رفيجتك تسولف لك عن طلعتها معاهم  ، انت رجل شخصيتك قوية اذا عطيتها مجال انتكون  لها حياة اجتماعية  و تكون واثق فيها  و ما تحس ان رفيجاتها تهديد لك . اقدر اعتبر الريال شخصيته قوية  اذا وقف مع زوجته و ساندها و افتخر بنجاحتها

بس اسفه اللي يعتبر قوه الشخصية انه كاسر راسها و حاكرها بالبيت و ما تطلع الا معاك و انت بالمقابل عندك روحات ديوانية و ربع  و تخاف و تلف و تدور و تصارخ و تخرعها على طلعاتها و تمنع من غير سبب ، يعني تقول لها لا تطلعين من غير سبب

من رأيي الشخصي : انت رجل شخصيتك مهزوزة و ضعيفة  لأن ما عندك ثقه بنفسك

لأنك يوم خذيتها و اهيا متعلمة و موظفه ترى كانت عايشة حياتها قبلك !! على فكره ؟؟ و شنو شعورك انها تتحلطم عليك بقلبها !! لين تنفجر و تقول حق الناس ؟؟

ودي اعرف اجابات :

مستعد انك ما تكلم ربعك ؟؟ مستعد انك ما تروح الديوانية ؟ مستعد بهالجو الحلو انكترفض عزيمة رفيجك حق البر ؟؟ مستعد انه حياتك تكون بس انت معاها ؟؟؟

ودي اعرف

و ارد و اقول الموضوع يعبر عن وجهة نظري الشخصية اللي مو عاجبه بالعكس انا اتقبل كل وجهات النظر

صديقاتي : انتوا كنز بحياتي 

ج : اعترف انك تخجلني بشخصيتك  و الحمدالله  اني التقيت بلإنسان الصح عشان اكمل حياتي معاه بالطريج الصح