ما تطبخين ؟؟؟؟ مو سنعه

I am not sure if I have to write this post in Arabic , I mean in Kuwaiti accent so I can use the proper words because I am mad .

راح اكتب البوست بالكويتي عشان اقدر اعبر عن حرتي عدل



و إحنا صغار ، كانت الألعاب اللي يشترونها لنا أهلنا غالبا ما تكون لها علاقه بشغل البيت ، مثلا المطبخ اللي معاه بيضه ، او مكينه تنظيف ، ادوات خياطه او بيبي نقعد نربيها


انا كنت من البنات اللي ما يلعبون في هذي النوعيه من الألعاب ، لدرجه انه امي خافت علي انه فيني شي لأني ما احب العب في الدوولز اللي تكون بيبي نربيها ، اغلب العاب انه عندي محل ملابس او اقعد اسجل صوتي و انا اقول الاخبار و اسجل برامج ، كنت اغني و ارقص او اسوي مسرحيات


للأسف هذي الفكره اللي الأمهات يربون البنات عليها انها تكون ربه منزل ناجحه او " سنعه " مثل ما نقول بالكويت ، و بالذات موضوع الطباخ .

علاقتي مع الطباخ كلش مو طيبه . من اقول كلمه ما اطبخ ، نظرات العالم تييني جني مسويه جريمه. امي عندها اني مفشلتها جدام اهل زوجي .

ليش وايد نسمع مثل هالسالفه : سنعه و الريال يرد البيت وجبته جاهزه و قايمه فبيتها و عيالها و مسنعه له هالاكل و الحلويات و تطبخ له و مو ناقصه شي و راح خذا عليها ، او انها ما تكون سعيده بحياتها لانه ماكو شي عاجبه

هل الطباخ و الوجبه الجاهزه المسنعه اهو الشي الوحيد المهم ؟

طبعا كلامي مو تعميم بس لازم تتغير هالفكره بالمجتمع ، انا موخبيره و لا قاعده افرض كلامي بس من التجارب اللي حولي فهمت انه هالشي غلط
اللي تطبخ لانها تحب الطباخ ،،، هذا موضوع ثاني

لازم الشخصين يعرفون شنو اللغه اللي يتفاهمون فيها مع بعض ، مثلا وحده تتفاهم بلغه الطبخ و زوجها مو مهم عنده اصلا الاكل يمكن يقدر يأكل توسته و جبنه و بس ، هني راح تبدا الزوجه تفكر و تقول كل يوم اطبخ له و اتعب نفسي و هو مو حاس فيني ما يبين لي انه حاب الاكل و تبدا تزعل و يعافي يومها كله ، بالمقابل هذا الزوج ما يفكر بالاكل كثر ما همه الاول انه يشوف حبيبته بكامل نشاطها و حيويتها تقعد تسولف معاه ! و طبعا الاخت راح تكون تعبانه من الطبخه.




عشان جذي من فتره الخطبه لازم الشخصين يعرفون اهتمامات بعض و شنو المهم عند كل واحد فيهم .

و ان السنع ما ينقاس بالطبخ بس

وين الثقافه و الاسلوب ، وين للحكمه و التدبير ؟ اعتقد انه المراه الناجحه اللي اذا صارت لها ظروف في غياب زوجها تقدر تتصرف و تكون مسؤوله و الا تبون تقعد تحمس بصل ؟


رجاءا مو لازم الكل يعتبر اللي ما تطبخ مو سنعه لان ما تدرون شنو الصفات اللي فيها اللي مخليها ناجحه في زواجها



- Posted using BlogPress from my iPad