
انا انانية :)
اي ابي كل شي ، ابي استانس و ابي اكل على راحتي و ابي اضعف و ابي رفيجاتي اطلع معاهم على طول و ابي ج اطلع معاه.
ابي اسافر مع اهلي ،مع رفيجاتي
و ابي اسافر معاه
يعني ابي كل شي :)
ج من فترة صارت علاقته قوية وايد مع واحد من ربعه و طبعا انا الينون اشتغل فيني
و مو بيدي انا جذي ،وايد اتحلطم ووايد اعصب ووايد اقارن
اي طلعت معاه بالويك ايند و انا تقولي ماحب طلعة ويك اند !!
و اسوي سالفه و اطنقر و ابجي
و من هالسوالف و اكثر
لين دق علي بيوم ج ج و قالي ترى رفيجي عازمنا بالشاليه
انا تفاجأت الصراحة ، ج من ايام الخطبة بين لي انه ما يحب طلعات او يمعات
Couples
و هالشي طبعا من حقه و انا فكرت بيني و بين نفسي هالطلعات بتزيد شي من حياتي ؟ او بتنقص ؟؟
لأ
عشان جذي ما ناقشت و لا احتجيت الصراحه لأن هالشي مو مهم
عشان جذي لما قالي انه عازمنا و اذا ودي اروح اتعرف على زوجته
فهمت انه وايد رفيجه عزيز عليه
طبعا اسبوع كامل لي الويكند و انا افكر و متوترة
ليش ؟؟ مادري ، انا متعوده اني اتعرف على الناس و كلش ما عندي مشكله ابد اني اسولف مع ناس اول مرة اشوفهم
بس ليش متوترة ليش حاشني عوار بطن كل ما قرب اليوم ؟؟
من الأفكار اللي مرت علي انه ممكن البنيه ما تبيني ازورهم ، يعني قلت يمكن الموضوع انه اللأصدقاء بروحهم اتفقوا و اهيا ما تبيني ايي ؟؟
تخيلت الوضع انه يمعة بالشاليه خالاتها او خواتها او اهلهم و انا شكو رازة ويهي
يمكن البنت لايعة جبدها من ج لأن نفس الشي يكون كله طالع مع زوجها مثل ما انا اتحلطم عليه
ما كنت ابي الوضع يكون يمعه حريم و السوالف عن اليهال و المطبخ تحوشني كآبة
و انا مثل هالأماكن مثلا الشاليه ، البر ، المزرعه احب دايما اكون معاه ماحب اكون بروحي
و اخر شي مابيها تكون اضعف مني !!!!لاحد يقول لي شكو لأن انا مادري ليش فكرت جذي
المهم وصلنا ، قلبي يرقع ، نفس الشعور اللي لما الوحده بيشوفونها عشان خطبة
الصراحه !!انصدمت
و استحيت على ويحي
مشالله مشالله مشالله شنو هالناس
الريال وايد وايد خوش واحد
و زوجته تينن استقبلتني جنها تعرفني من زمان و امها كانت موجوده مشالله مشالله ،الوضع ما كان فيه كلافه كلش
ما قصروا معانا لدرجه ان ج طلع مع رفيجه و عياله و انا قعدت معاها وايد وايد استانسنا
الشغله اللي تعلمتها
ابدا لا اقعد اتخيل علاقتي مع ناس ما شفتهم و اقعد احط احكام من كيفي
شي ثاني مهم ، العزيمة كانت حركه ذكيه وايد وايد من ج و رفيجه ، لأن الحين لا يمكن اني اتكلم كلمه او اتحلطم عن رفيجه لأن الريال ما قصر و قام فينا
JJ you are the winner :P
يالله هذي نصيحه حق كل واحد يعاني مع زوجته من نفس المشكله
عرفها على زوجته :)