احنا الكويتين ،عارفين شنو احنا ؟؟ شوفوا منو انتوا

ما كتبت من زمان بوست من هالنوع لأني كنت مابي اطلع عن الهدف الاساسي اللي عشانه سويت هالبلوق ، مع اني وايد كتبت مواضيع مختلفة .بس هالمرة قررت اني اكتب عشان اطلع اللي بقلبي

سافرت مرتين دبي هالشهر ، سفرة التسوق اللي يوم واحد ، ما كتبت عن السفرة الأولى شي و الثانية كانت السبت اللي فات ، ما ابي اتكلم عن مطاعم و لا محلات و لا شي وايد ناس كتبوا مشالله و كفوا ووفوا

دبي ، دايما لما اي احد يتكلم عن دبي و يقعد يقارن بينها و بين الكويت و الكلمة اللي دايما الكل يقولها "شوفوا دبي وين وصلوا"و اللي يشتطون عليها ،انا كنت تعصب و ما ارضى احد يتكلم و اقعد اقول شدعوة يعني هالخبة !!!دايما سفراتي دبي تكون ترانزيت

و مرة يوم حضرت سيرك قبل سنتين و ما طولت فيها

اللي ابي اقوله ماله اي علاقة بحجم مطار دبي ، و لا التعامل الراقي و الإبتسامة اللي تفتح النفس من موظفين جوازات مطار دبي ،و لا النظام و الإحترام من موظف تنظيم سيارات الإجرة و اختياره لنا تاكسي نساء و عائلات لأن ما كان معانا ريال ،و لا المترو اللي عطانا احساس انه احنا بأوربا من النظافة و الترتيب و التنسيق ،

و لا دبي مول اللي احنا الكويتيات اللي لافين دول العالم كلها نسوق فيها تارسين المحلات و نشتري المحلات اللي نتمنى انها لو فاتحة بالكويت و اهي موجودة بكل دول الخليج الا احنا

و بعد مابي اتكلم عن النافورة اللي امي دمعت عينها و قامت تقول حق الإخوان السودانين اللي كانوا يمها انه الكويت اول دولة بالخليج كان فيها نافورة راقصة

في شي بعد ينقال ؟؟

اول الشهر لما رحت مع رفيجاتي اسألتنا وحده

she works in candylicious : R u from kuwait ?????

we said : Yes , how did you know ??

she replied u r always smiling !!!!!!!

هالمرة مع امي اكثر من محل سألوني انتي من الكويت ؟؟ لما اقول اي يقعدون يمدحون ؟؟؟ يمكن تقولون قاعدين يبالغون او بس جذي عشان قاعدين نشتري منهم

بس الكل

حتي بنات من كرواتيا عند ماك

تدرون شنو قالوا عنا ؟؟؟

عن الكويتين

بختار الكلمات اللي انقالت

شعب راقي

الكويتين كلهم ذوق

الكويتين مثقفين

الكويتين حبوبين و يونسون 

يحبون الإبتسامة 

So friendly 

شعب متسامح و يحب يساعد 

شعب يحب الحياة و طموح 

شعب عنده امل 

كل هالصفات فينا ؟؟؟ 

و مو احنا قلنا عن عمرنا 

الناس من مختلف الجنسيات  قالت جذي 

احنا ندري ان الأمم ما ترتقي الا بشعبها و هالشي درسناه و تعلمناه 

انزين احنا شعب فينا كل هالصفات 

و بالذات انه عندنا امل 

ليش ما نشوف هالشي بديرتنا ؟؟؟ 

ليش الكل متأزم ؟؟ ليش الجو العام بالكويت متشائم 

ليش مو قادرين نغير ؟؟ 

الشعب و الناس و بالذات احنا الشباب فينا كل هالصفات و ووايد ابداعات و انجازات قاعدين نسويها 

قيادتنا ؟؟؟ طول عمرنا معروف انه الحمدالله حكام الكويت من افضل و اكثر الحكام اللي يخافون على ديرتهم 

عيل وين المشكلة ؟؟ القيادة حكيمة و الشعب لا غبار عليه 

احنا الكويتين عارفين شنو احنا ؟؟شوفوا منو انتوا ياللي قاعديت تخربون ديرتنا

ما نقدر نكون نفس دبي ؟؟؟ نقدر و الله نقدر 

بس في شي 

احد يقدر يفهمني شنو هالشي ؟؟؟؟؟؟ 

يمكن المسرحية اللي بدا عرضها ؟؟؟؟؟!!!!

يمكن 

بالنهاية 

مشالله عليكم يا اهل دبي و عساكم دوم مثل ما شفتكم 

يعطيكم العافية   

و مثل ما قالنا موظف الجوازات انشالله دوم نشوفكم منورينا 

اكيد راح نزوركم ووايد بعد ;)