و الله ترى كل بنت و الله زينة :)

من صارت لي هالسالفة و انا ودي اكتب عنها بس مترددة ، و اللي يخليني مترددة اني مابي اخرب على احد و لا ابي اكون اني تكلمت عن احد ،بس قلت بكتب بس بدون تفاصيل دقيقة مو عشان شي عشان الواحد يتعلم و يعتبر

من زمان و انا ابي اشغل وقتي ، عندي وقت فراغ و كنت اقضيه طلعات و مطاعم و لويه ، بعد ما سويت ريجيم طبعا ما كنت اروح عشان جذي عندي وقت فراغ وايد 

و ج دايما يقولي سويلج شي و شعلي نفسج ، و طبعا يطفرني اني انا كله مالي خلق شي و كسلانة ، المهم  وحده من رفيجاتي مشالله عليها متخصصة بشغل المعارض و سوت وايد اشياء و انسانة نشيطة مع انها صغيرة بالعمر . المهم دام انا فاضية قلت بشتغل معاها  و خاصة انها الحين قاعده تشتغل مع قروب من بنات و شباب من مختلف الأعمار.

رحت و قابلت رئيس الفريق و بالعكس رحب فيني و مشالله كلمني عن المشروع اللي بيشتغلونه و كان شي وايد على مستوى المهم ودي ادش بتفاصيل بس ما اقدر بعد مده حسيت ان الإمور مو واضحة . في اشياء مخفية و الكلام و الوعود و الأرباح شي بالهوا ماكو شي ملموس

تكلمنا بينا و بين بعض انه حفظا للحقوق لازم يكون في عقود

العقود كانت هي القشة التي قصمت ظهر البعير و مادري اذا المثل صح او لأ مكانه

بس تكلمنا بالموضوع كل شي تغير ،رئيس الفريق مبدع بالنسب اللي راح تكون بلأرباح ، و بعدين اهما قبل لا ادش معاهم كانوا مشتغلين على معرض و الأخ بينصب عليهم نصبة محترمة !!انا من شفت جذي و الله قلت ماله داعي اعور راسي لأن الموضوع اللي ضايقني مو الفلوس اللي ضايقني الإستغلال و النصب و شافنا بنات قال العب عليهم

طبعا وايد امور كانت صايره انه كان مخليهم يدفعون مبالغ عشان اجار مكتب للشركة و المكتب كان شقة سكنه الخاص !!

 و اشياء وايد وايد انصدمت منها و كنت احس انه اللي يصير بالمسلسلات شي مو صج و انه مو معقوله في ناس جذي

بس و الله شفت

المهم انا اعتبرها تجربة و استفدت منها و تعلمت  و كلش ما خسرت شي  ،انا ودي اني اتكلم بالتفاصيل لأن كل اللي سمعوا الموضوع طقوا على راسهم بس ما اقدر

الحين ،انا ودي انه يكون لي دور مهم  او اني اسوي شي يضيف لي بحياتي  ، اي ممكن اخذ دورات ادخل ورش عمل و غيرها لكن ابي القى نفسي ،و اعتقد انه الوقت وايد متأخر اني القى نفسي

مشكلتي اني ما عندي مواهب حرفيه ،يعني لا ارسم و لا اصور و لا اطبخ  موهبتي احب اتكلم :)صج و الله احب اتكلم

اي اقتراحات ؟؟؟؟

انشالله راح ايي اليوم اللي راح القى الشي المناسب لي

  اخر شي اهدي هالأغنية حقي  و حق كل بنية كانت معاي بالقروب  و حق كل البنات بس :)

لأن  و الله احنا زينين و عندنا طموح و كل شي نبي نسوي بس و الله الدنيا مرات تعطينا جم طراق صج يعلمنا