اسمج على الراس يا ارض الوطن يا كويت

رديت للكسل  اي انا كسلانة ، و ضايق خلقي انه اكثر شغلتين بحياتي احبهم قمت ما اسويهم ، مو قاعدة اقرا و لا كتاب و بنفس الوقت مو قاعدة اكتب .

ليش ؟؟؟؟ لاهية حدي  بال بي بي ، تويتر و تلفزيون  .كان في مشروع حلو داشه فيه بس طحنا مع ناس نصابين و هذا بروحه يبيله بوست بروحه . المهم

انا من زمان و يمكن قايلة اكثر من مره اني ما احب اتكلم بالسياسة و لا اكتب فيها و لا اتدخل ،موعشان اني انسانة سلبيه بس و الله اتعب

بس بين فترة  و فترة احس ايني الشعور اني  ابي اقول شي ،احساس بقلبي .من فترة صار نقاش بالدوام انه خلاص يبا راحت الديرة و الكويت بس حدها 10 سنين  و خلاص يا تاخذنا ايران او السعودية و كلام وايد وايد يتعبني ما اقدر اسمع جذي

المشكله انه اللي قاعدين يتكلمون بنات من عوايل معروفة و جذورهم مغروسة بهلأرض بس انصدمت من تفكيرهم و نظرتهم ،و الله قعدت اقول بقلبي اذا هذيل جذي قاعدين يفكرون شلون حال الباجي اللي تجنسوا من 20 سنة ؟؟؟ اكيد ماكو ولاء عيل !!

مابي اتكلم بلسان احد و لا عن احد ، ابي اتكلم عن نفسي ،انا متفائلة و قلت هالكلام حق هالبنات و قالوا لي صيري واقعية و لا تقصين على عمرج !!!

و الله صج اني متفائلة ، يمكن كلامهم صح قاعده اتحاشى اني افكر بالواقع بس مابي افكر بهالطريقة !!و اكيد في ناس وايد مثلي ، و حتى لو كنت بروحي افكر جذي ،انشالله انشالله كل شي بيصير مثل ما الله كاتبه لنا .

صج الناس صاروا غير ،ماديين و مو عاجبهم شي ،و يتحلطمون و ينصبون (طبعا موضوع النصب مأثر فيني )و كل الصفات  اللي تتخيلونها صارت فيهم !بس هم انا متفائلة  لو تعطلت مشاريع ، لو تأجل افتتاح استاد جابر ، لو ان المدينة الجامعية ما افتتحوها ،لو ان الرياضة عندنا من سيء الى اسوأ لو ان الأشخاص اللي اختاروهم الشعب انه يمثلونهم غدروا فيهم لأن اختيار الشعب لهم ماكان بنية صافية لو الكويتي يغلط على الكويتي و ما يعتذر لو الكل يفكر بس ياخذ من هالديرة و لا يعطي راح اظل اتفائل  الله كريم و اذا بتفائل مو عشان شي عادي .....عشان شي واحد بس

الكويت

كلمات قاعدة تأثر فيني وايد :

اسمج على الراس يا ارض الوطن يا كويت

بنرجع لكم مثل ما يرجع حمام البيت

هذا كلام اهل الكويت مو الحين الكل يفكر شلون يترك هالبيت

الله يحفظ ديرتنا و كل اهل الكويت