عقد الجواهر الثمين (اي راح اتفلسف)كيفي

مشالله وصلنا نص السنة تقريبا ،و الجو بدا يتغير و الحرارة ما راح اتكلم عنها :)

الحمدالله احسن من غيرنا بوايد اشياء :)

البوست ما راح يكون عن شي محدد

Random Post

قاعدة احاول اذكر شسويت و شصار خلال الشهور اللي طافت من بداية السنة ؟؟

المشكلة اني مو قادرة اذكر شي !! لما كنت يوميا اكتب بوستات تقريبا كانت حياتي كلها موجوده هني ، و لما ارجع اقراها وايد استانس

الحمدالله

بس الحين بحاول اذكر اللي اقدر عليه لأن مو صج النسيان اللي حايشني

في شي فيني متغير اني صايرة احب اقعد بالبيت و ما عندي مشكلة ابدا اني ما اطلع و هالشي مو طبعي ،انا كنت تقريبا اكثر من 4 مرات بلإسبوع اكون بلأفنيوز بحكم انه قريب مني بس صايرة مالي خلق اروح و عرفت ليش

كل ما ادش يحوشني عوار راس ، و مو اي عوار راس ، صداع نصفي

صج صج تلوع جبدي بعدين فهمت ليش ؟؟؟ وحده من رفيجاتي تقول تكره الأفنيوز من عوار الراس اللي يحوشها

و السبب الجيوب الأنفيه !!و بعدين التهوية و التكييف احس فيهم شي مو صح و مادري متى راح نتطور و نوصل مرحلة ان الناس يحترمون بعض و ما يدخنون دايما ريحة ملابسنا زقاير من نرجع من الأفنيوز

am watching SNL o mayta mn elth7k

ودي اتكلم عن شغله بس ماني قادرة ادش بتفاصيل وايد اخاف اسبب مشاكل

وااي بس حجي وايد بقلبي و لازم اتكلم ما اقدر

انا داشة مع قروب قاعدين نشتغل على مشروع معين و للأسف قاعده اشوف اشياء فيها غموض و اشياء غريبة

و تأليف و شخص قاعد يخربط

مرات افكر اني ما اكمل معاهم بس ارجع اقول خل اشوف الوضع و بعدين انا مو خسرانة شي خل اعتبرها تجربة اتعلم منها

بس لازم اكون مفتحة و ما تورط بشي

احلى شي اني اكون قاعده معاهم بلإجتماع و قاعدة اتطمش

و الله كريم :)

.....................................................................................................

من اخر اكتشافاتي

انه وايد بنات اعرفهم من عمري بأواخر العشرينات كلهم ياخذون حبوب توخر التوتر و القلق و تاثر على الحالة النفسية

يتكلمون عن مشاكل يعانون منها و من حياتهم

سبحان الله ؟؟ ليش جذي قاعد يصير ؟؟ و شنو الأسباب ؟؟

طبعا انا ما الوم اي انسانة و ما اقدر اني الومهم و بعد ما عندي اي مشكلة انه الوحده تروح عيادة استشارات نفسية ووايد بنات يروحون

البنات قاعدين يفكرون انه يروحون حق التنويم المغناطيسي

انا اللي قاعده افكر فيه ، ليش هالشي زاد ؟؟ ليش التعب النفسي و التوتر ؟؟

راح اتكلم عن شي يمكن ما بديت اتكلم فيه بالطريقة هذي الا بالفترة الأخيرة

انا شخصيا مريت بفترة من حياتي بتعب نفسي مو طبيعي ، و ما انكر فكرت اني اخذ حبوب تنومني و حبوب مهدئة

بس كنت ما اقدر . هالفترة كانت السنة اللي فاتت تقريبا مدة 10 شهور

اعتبرهم فترة حاليا انا شلتها من حياتي

كانت فترة اعالج فيها ،و عشت فيها بصراع مو طبيعي و صرت انسانة مهووسة و مو طبيعية ،كنت اتعب نفسيا و كنت كارهة كل الناس بس غصبن علي اجامل عشان تمشي حياتي ، زاد وزني و تغيير شكلي كنت حساسة الى ابعد الحدود و ما كنت ابي اي احد يدري اني اعالج ،و اي شخص كان يولي انه وزني زايد او متنانة او شفيج متغيرة كنت احكم عليه بلإعدام و ينقط بحفره انا متخيلتها عشان احط فيها كل الناس اللي ما احبهم .

تمنيت اني اعيش بروحي ،مو بالكويت و بمكان ما فيه احد يعرفني ، و تمنيت و هالشي اول مره اقوله و يا رب ما يزعل مني حبيبي

تمنيت اني انفصل !!لهدرجة وصلت من اليأس و من الغضب اللي كان فيني

و اكثر شي متعبني

و اللي صج مخليني احس بتأنيب ضمبر

ايماني الضعيف .

استغفر الله و اتوب اليه يا رب يغفر لي شنو كنت اقول

كنت ساخطة و كلمة ليش انا دايما على لساني ، كنت اعاند استغفر الله ،في احد يعاند رب العالمين ؟؟؟

كنت بالصلاة لما يكون وقت الدعاء ما ادعي ربي

!!

كنت اقول اني تعبت و انا ادعي و كل مره يفشل العلاج و كلام وايد كنت اقوله عسى ربي يغفر لي انشالله

تعبت وايد هالفترة و حسيت اني محتاجة علاج

و حالتي من سيء الى اسوأ

و ما استوعبت ابدا انا الحل كله جدامي و موجود معاي

اخر شي كانت الصدمة الكبيرة

انه كل شي بالعلاج كان ماشي مظبوط و كل التحاليل و الفحوصات تبين انه كل شي مهيء

و انصدم و ينصدم الدكتور انه كل شي اختفى !!

هني طلعت من المستشفى والله ما اجذب اني مو حاسة بالعالم اللي حولي امبيه نفس الأفلام

ما اسمع و لا اشوف الناس حسيت اني كل شي حولي اختفى

العوار اللي حاشني صوب رقبتي لما احاول ابلع لأني كنت راح ابجي بس ما احب تنزل دموعي جدام احد

مادري شلون مشيت لي السيارة و مادري شلون سقت لي البيت

دخلت و شفته و عيوني متروسة دموع طبعا عرف الموضوع جان يقولي كلمة اكتشفت اني من زمااااااان مادري عنها و نسيتها

"الحمدالله"

و ابتسم و قالي :عيونج شكلهم حلو و اهما يلمعون

اهني استوعبت ، انه العلاج النفسي و الراحة النفسية كانت بكلمة وحده

"الحمدالله"

و الدكتور النفسي اللي يساعدني

كان عندي

"حبيبي"

JJ

اللي مشالله عليه موضوع القناعة و الرضا باللي الله كاتبه له شي وايد كبير

اذكر يومها اني قمت و صليت صلاة استخارة اني راح اوقف العلاج

و اول مرة من مدة وايد كبيرة ادعي ربي بصدق و اخلاص و احمده و اشكره على كل شي صار لي بحياتي

الحمدالله خذيت القرار و اهو قرار مو سهل لأن المجتمع ما راح يخليني بس سبحان الله حسيت اني وايد مرتاحة

و تغيرت حياتي

تعلمت انه كل تجربة تمر على الإنسان لها هدف و درس يتعلم منه

و الدرس اللي تعلمته اهو درس

الرضا و الإيمان انه الله سبحانه و تعالى عالم بالغيب و معطيني الشي اللي انا محتاجته مو اللي ابيه

و ان الأرزاق متوزعة علينا البشر كلنا بالتساوي بس كل انسان على حسب احتياجه

و بالنسبة حق JJ

عطاني شي يسوى فلوس الدنيا كلها و هدايا العالم

راحة البال

الحمدالله على كل حال والله اللي يدرون بسالفتي يقولون لي لا تقولين حق احد عشان لحد يحسدج

:) بس انا مو جذي اذا ارتحت بشي احب الكل يعرفه

اللللله من زمان ما كتبت بوست جذي !؟!؟!

اخر شي

احلى خبر سمعته السنة عن انسانة عزيزة علي

الف مبروك حبيبتي و الله يوفقج و يتمم عليج يا رب

و بس

:) انشالله كل اربعاء

راح يكون بوستي عبارة عن

جوهرة من عقد حياتي

لأني قررت انه حياتي هي عبارة عن اغلى عقد من الجواهر الثمنية ارتديه بفخر امام

العالم اجمع