يا بو فلان ,,,يا بوفلانه

من الأشياء الغريبة اللي مرت علي بحياتي و لا زلت اتسائل عنها و لم اجد لها اي تفسير الى الآن :)

هاهاها مادري شفيني على اللغة العربية الفصحى

المهم انه من يوم كنت صغيرة لي الحين عمري ما سمعت امي تنادي ابوي باسمه !! تناديه بوفلان او بابا بس اكثر شي بوفلان ،لدرجة اني مره اتصل رفيج ابوي على تليفون البيت و قطيعة ايام اللي لما كنت صغيره يقولون لي ناد ابوك !!اوووف ما يفرقون

المهم دق الريال جان يقول وين فلان ؟؟قال اسم ابوي جان اقوله النمرة غلط !!انا ادري انه اسمي فلانه فلان بس مادري انه هذا اسم ابوي لأني ما سمعت امي تناديه

انا مستغربة لأنه امي موظفة و ناشطة تربوية و ابوي بعد تربوي يعني نوعهم يروحون مؤتمرات و وايد عندهم انشطة و لويه و ناس عمليين لكن امي ما تناديه باسمه !!! قعدت افكر و سالت رفيجاتي اللي اهلهم من جيل اهلي و امهاتهم نفس مجال عمل امي تقريبا بعضهم قالوا نفس الشي

قعدت افكر ،هل راح ايي يوم و ما اناديه باسمه ؟؟؟ لا لا مابي ،مو قلة احترام و لا اني شايفة نفسي عليه بس احب اناديه باسمه ،يمكن الجيل اللي اكبر منا عندهم هالشي احترام للرجل ،بس بالنسبة لي راح احس اني حطيت حاجز بيني و بينه

و انا ما احب تكون بيني و بينه حواجز و احب اكون على طبيعتي

بس قاعده افكر شي بروح بيتنا و بحن على امي انها تنادي ابوي باسمه لووووووول بضحك واايد