صور الأحمدي من تصويري المتواضعفبراير شهر الأفراح ، شهر المناسبات ، انا من يوم كنت صغيرة دايما الشهر ترتبط بالوان معينة فبالي مثلا شهر مايو دايما يطلع لي فبالي لون اخضر ، شهر اغسطس برتقالي شهر ابريل وردي
شهر فبراير من زمااااان يطلع لي ملون وايد الوان يمكن لأن من الصغر مرتبط بالعيد الوطني .
الإسبوع اللي طاف حاشتني حالة استعسار و انا من الناس اللي اصير ام الملاقة اذا استعسرت و مادري من شنو و طبعا منو اللي ماكلها ؟؟؟
JJ
و الصراحة عقب ما تهدا اعصابي و اطخ من الإستعسار وايد وايد اتحسف على الشياء اللي اسويها و انا بالحاله هذي .لكن انا ودي من الرجال ان يتفهمون طبيعة استعسار المرأة انها تبدا تطلع كل العيوب حتى لو كانت صغيرة و تتصرف تصرفات مو صج و بهالحالة لازم الرجل تكون عنده ردة الفعل المناسبة و اتمنى لو احد يقدر يعرف شنو ردة الفعل الصح . الموقف اللي سويته اني من فترة طلبت اغراض الجمعية و مع اللوية كل يوم نأجل و بما ان انا معاه بس اثنين و ما نطبخ ،اغراض الجمعية بالنسبة لنا بسيطة و لو نقصت ما تاثر وايد
المهم انا احب اروح جمعية مشرف و بهاليوم قالي ج انه عنده شغل و عطاني فلوس الجمعية و قالي بطريجج حق بيت اهلج اشتري الأغراض ، انا مازلت في مود العسارة بس قلت اوكي بروح اشتري ، و انا قاعده الف بالجمعية و ترست العربانه و شريت فواكه و الشغلات اللي ابيها دقيت عليه و لا اسمع انه بالدوانية . الموقف عادي جدا و لو كنت بمزاج زين جان عده على خير شنو تصرفت ؟؟ عصبت حدي و هديت العربانه و طلعت من الجمعية و انا اكلمه و انا معصبة ..الحمدالله اهو يعرف اني بهالحالة اصير املق من الملاقة بس يعرف شلون يتصرف معاي ،طبعا بعدها بيوم شرى الأغراض و عدى الموضوع على خير ،امي لما كنت اسولف لها السالفة و اضحك زفتني و فهمتني الحياة تعاون و مو مشكله لو رحتي الجمعية بيوم ما قدر يروح .
طبعا انا ظليت بمود سخيف لين قلتله اني محتاجه اصور الكلية بالزينة بالليل عشان اعرضها بالشاشات الموجوده ،طلعنا بالليل و رحنا صورنا بعدها رحت الأحمدي و شفت الزينة و استانست حدي و خلاني على راحتي و صورت و استانست بعدها تعشينا و ردينا البيت
و ايد وايد حبيت شكل الكويت بالزينة وااااااايد و الأحمدي تينن
بعدين عرفت انا ليش جذي كانت حالتي كنت ولهانه عليه و ابي اطلع معاه لأن من زمان ما طلعنا
و طلعت صج ولهانة
عشان جذي نصيحة حق كل ريال اذا استعسرت عليك و قامت تملق ترى اهيا ولهانة
3 comments:
شلون موودج ألحين ؟؟؟
ودي ازنط المره اذا دشت الحاله هذه ومالي خلق اشوفها او اقعد معاها
7adaaa sa7 !!! kel kilma gelteha sa7.... offf shno el est3sar eli mn ghair sebab, la o etha gal kelma ghala6 maskeen 3adi ten3ifis el dnya :P
ana i think ena nesta3sir lma nabi ehtemam, nafs el yahal sometimes ;p
Post a Comment