Tuesday, February 16, 2010

النص الثاني :)



هاليومين الكلام زايد عن الحب ، من يوم الفالنتاين ، وايد اغاني حب ووايد سوالف حب . هاليومين بالمارينا اف ام كانت المواضيع عن الحب ، الشي اللي خلاني استغرب غالبية اتصالات البنات اللي سمعتهم لأني بامانة ما سمعت كل البرنامج ، البنات كانوا يتكلمون عن طبيعة العلاقة بين الشخصين و شلون لازم تكون مبينة على الثقة و الإحترام و الحب و هالكلام الي يبين ان الوحده تتكلم بعقل . الشي الي استغربته اتصلات الشباب !! انا ما سمعت اللي بجى على حبيبته بس الكل كان يتكلم عنه . بس سمعت اللي حب خمس سنين و بعدين تزوجت رفيجه و قال عنها شعر يا بعد قلبي كسر خاطري . بس استغربت يعني شباب الكويت مشالله مفتحين و يلقطونها و اهيا طايرة يعني معقولة ممكن ينجرحون او وحده تقص عليهم باسم الحب ؟؟؟؟ بس و الله كسروا خاطري و استانست شوي مادري ليش .
تحول النقاش بالدوام اليوم عن الحب و صار في اختلاف بلأراء انه ما يصير الوحده تكلم خطيبها بالتليفون ، انا معارضة الصراحة احس انه ما في مانع الوحده تعيش الحب و اهلها يدرون و شي جميل انه تحبه ، لأن هالفترة راح تكون فترة حلوة .

قريت في وحده من اساطير الإغريق تفسير انه ليش الواحد يعيش طول عمره و اهو يدور نصه الثاني ، انه الإنسان ما كان اساسا ذكر و انثى كان مخلوق مشترك عنده راس واحد جانب رجل و جانب امرأة و عنده اربع ايادي و اربع ريول و يعيش و يبني بلأرض و يتكاثر بعدها الآلهة فكروا انه هذا المخلوق راح يتفوق عليهم بكل شي لأنه سريع و يتحرك و يبني و يتكاثر فقرر احد الآلهة ماني ذاكرة بالضبط بس اعتقد انه اله البرق انه يعطي هالمخلوق صاعقة فصلته بالنص و صاروا مخلوقين رجل و امرأة و منها بدت سالفة ان الإنسان عايش طول عمره يدور نصه الثاني : ) و هني طلعت مقوله نصفي الثاني طبعا السالفة كلها اسطورة

الحب علاقه حلوه و اتمنى انه كل اثنين يحبون بعض انهم يتزوجون ، زواج الحب بنظري ناجح ، لأن مهما زادت المشاكل و مهما صارت خلافات راح يظل فيه احساس حب بس ودي استفسر الشباب لي الحين لهم هذي النظرة انه ما يتزوج وحده كان يحبها !! على ما اعتقد تغيرت لأن مع كل التطور اللي دش علينا اخر خمس سنين ، راح يكون واثق انه اللي تخطبها امه مو مثل اللي عرفها ؟؟

و دام هالأيام كلها حب يا رب يا رب اللي كل يوم قاعده اشوفهم بالممشى اثنين حدهم طايرين بالحب ، يا رب انهم يتزوجون لأنهم مشالله يشوقون و من كثر ما انا مشتطة فيهم لما اشوفهم استانس : )

يا رب يزيد الحب بين الناس ، يا رب يزيد الحب بين كل اثنين يحبون يعض ، يا رب يزيد الحب بين الرفيجات ، يا رب يزيد الحب بين الإخوان و اخيرا :
يا رب يزيد الحب بيني و بينك و يخليك لي و يخليني لك انشالله يا نصفي الثاني


5 comments:

A/Z said...

ameen

Nikon 8 said...

آمين والله يزيد زيحافظ على المحبة بينج وبين أحبابج
يا رب
:)

Ƒiona H. Al- Ƨharekh said...

يعطيج العافيه

May ur life be filled with Love
& Happiness InShala :***

Danderma said...

ليش يعني واحد خاطب وحدة ما يكلمها بالتيليفون؟ شخباري أصلا انه التيليفون ممنوع؟؟؟؟ عيل شنو خذوه فقلوه؟

مرة وحدة خطبت من اهلنا، قالولها مو مشكلة نشوف الولد بعدين نخليهم يكلمون بعض إسبوعين... جان تصرخ الأماية و تقول "الله يستر على بناتكم"

ما أقول إلا الله وياك ويا ولدك... ناس بعالعقلية المتخلفة مالها إلا باب الصكة

Miemie said...

:*
Wallah entay a fountine of love and hope, Mashallah :***

Amiin oo ajma3een sweeie ;*