مشاركتي بمؤتمر تطبيقات الطاقة البديلة ضرورة ام خيار

مشاركتي بالمؤتمر او بالمعرض المصاحب للمؤتمر عن طريق مركز عملي كانت مشاركة ممتعة و لو انه ما بلغونا الا بآخر لحظة بس الحمدالله كل شي كان ممتاز ، المؤتمر الصراحة مشرف و يعطيهم العافية جمعية المهندسين على الشغل العجيب اللي مسوينه و كلهم متطوعين الصراحة المؤتمر يرفع اسم الكويت



بس انا بتكلم عن المعرض ، عني انا بالمعرض ، بما انه احنا 3 موظفات بالقسم وحده منا لظروف صحية ما تقدر تداوم عشان جذي لازم وحده تكون موجودة بالقسم و انا اكون بالمعرض صبح و عصر


انا وايد احضر معارض و من خلال تجربتي فيه نماين من البشر تمر عليك ، شي غريب و عجيب و راح اقسمهم :


المختصين : يكونون ناس مختصين و مهتمين بنفس مجال المعرض ، و هالأشخاص عادة يكونون دكاتره و صج لهم سالفة في انهم يحضرون المعرض . و منهم مجموعة دكاترة امريكان وايد وايد كانوا مهتمين بحقوق المرأة وسألوني اذا متزوجة او لأ لما جاوبت قالوا لي ما صارت لج مشكله مع زوجج انج واقفة بالمعرض ؟؟؟ فهمتهم انه بالعكس ترى الدين الإسلامي عطى المرأة كل حقوقها و عطاها الحرية ، حرية التعبير و حرية الإختيار و الفكره اللي انتوا ماخذينها عن مجتمعاتنا وايد فكرة غلط و للأسف بعض العادات و التقاليد اهي اللي سببت بعض الكبت مو الدين الإسلامي وايد ركزت على هالشي لأني ابيهم ياخذون فكره زينة عن الإسلام و الصراحة كانوا وايد منبهرين بالكويت و اشلون انه عندنا مهندسات و نساء متميزات ، و هم اسألوني اذا صج انه المرا ما تقدر تطلع جواز سفر الا بأذن زوجها و قلتلهم انه لأ خلاص خذينا هذا الحق .

الشفاحة : هذيل الناس اللي ايوون المعرض بس عشان ايمعون الجياس اللي فيها الهدايا الاللي عادة تكون اكواب و اقلام و ميداليات و خرابيط هالفئة تقهرني ، يعني تشوف الوحده مو قادره تمشي من كثر الجياس اللي شايلتهم

الله يخليج شالله حادج ؟؟؟؟؟ موقف مر علي انه يتني وحده على طول جان تقول شنو توزعون !!!!! عفوا احنا بيت زكاة و لا شنو ؟؟؟؟ عاد احنا الصراحة ما عندنا شي الا بروشور

جان اقولها ما نوزع شي ردت جان تسأل انزين ماكو هدايا ؟؟؟؟؟ لأ ماكو

جان تقول باخذ كاكاو .

وحده ثانية شفتها اول يوم المعرض جياس الدنيا عندها ثاني يوم المعرض جان اشوفها و ماخذه نفس الجياس ليش يا ربي ليش


بابا عودات : هذيل شي عجيب اينن : ) بس يبون يسولفون اي سالفة لي شغل فيها و لا ما لي شغل فيها ، اليوم واحد عطاني محاضرة عن النظافة و شلون لازم نحافظ على البيئة بعد قلبي اينن  و قالي انه فيه سكر و كله كاكاو وايد لذيذ بس ما قط القرطاس على الأرض


القز : مجموعة من البنات حد الكاشخين بس يرتزون بلأماكن اللي فيها شباب : ) اوكي ارتزي و سولفي و بالعكس يمكن ينعجب فيج الولد و يصير بينكم نصيب بس اذا بتلزقين 3 ساعات ترى بيكشت فيج و الله .



و الله وايد موقف صارت بس و الله ماني قادرة اذكر ، بس بشكل عام انا متعتي اني اشارك بمعارض

و هالمعرض مشالله صورة مشرفة صراحة للكويت يعطيكم العافية