صباح الخير :)
و مبارك عليكم شهر و لو اني وايد متأخرة ، مشالله بدا رمضان و بدت اللوية :)
قررت قبل ان يبدأ رمضان انه هالسنة راح يكون غير ،حطيت لي اهداف و انشالله ناوية احققها ,قلت ما راح اطلع و لا ازور و لا غبقات lابي اقعد بروحي و افكر
من ثلاث سنين و انا كل رمضان يمر على كله لوية عشان جذي قررت السنة تغيير ،لكن الواحد يقرر يتغير لكن العزايم و الغبقات ما تتغير بس بعد اهون من كل سنة
كنت مفكرة اني اتعلم اطبخ بس هالفكره شلتها من بالي بعد ما نسيت الفرن مفتوح قبل رمضان بيوم و اعترفت وقتها اني لا اصلح للعمل المطبخي .
وايد احداث صارت من اول اسبوع برمضان ،تلوث مشرف يا بعد قلبي كل ما اروح بيت اهلي تكفخني هالريحة و الشوارع تلوع الجبد واااي حسافتج يا مشرف
الشغله الثانية برنامج سكوب و الخبة اللي صارت عليه اللي ماله داعي الصراحة يطلعون نواب و يدلون بهالتصريحات برنامج فاشل و سامحوني على الكلمة قمة الوقاحة الصراحة و انا من اشد المؤيدين انه توقف لأن حرة الراي ممكن تكون على اصول مو قلة ادب
بعد قلت اني ما راح اتابع مسلسلات بس قعدت اشوف مقتطفات و حاليا اتابع الهدامة و ام البنات اللي كالعادة تحلطمت و ما عجبني بالبداية كله جذي اتسرع و بعدين بعد ما شفت بعيوني انه واقع انشالله راح اكتب بوست كامل عن الموضوع
تقبل الله طاعتكم و اليوم اول يوم احس اني يوعانه :)
