Tuesday, June 02, 2009

فقرة الحجاب الكبير ....الى متى ؟؟؟؟

انا باجازة انشالله لمده شهر و نومي اعتفس من الحين :) المهم اليوم رحت تغديت بلأفنيوز طبعا ماكو مكان غيره ذهبت الى دورة المياه (ضحكت و انا اكتب دورة المياه

هناك كان اكو بنتين مع امهم البنات كانوا مو صغار يعني بحدود 27 و فوق مو اصغر مع امهم لما دشيت و الا قاعدين يعيبون على الحجاب يعني من هالحجي ويع قطيعه ما احب الحجاب و الحجاب هلاقه و من هالكلام بما اني انا متحجبه كان المفروض اتصرف و اتكلم بس مادري ليش ما تكلمت و انا قاعده اعدل حجابي طاحت عيني بعين امهم و بس , امهم متحجبه جان تقول اي و الله هالحجاب بو ترتر و الخرابيط جان تلتفت علي و تقولي انتي حجابج حلو مع اني ما احب الحجاب بس حجابج حلو
انا ابتسمت و ما رديت
انا ادري انه وايد متحجبات عفسوا الحجاب و خلوا النظره للمتحجبات هلاقه انا شخصيا وصلت مرحله انه ما قام شكلي يعجبني احب شكل البنت اللي مو متحجبة فما ما ادري ليش جذي المجتمع جبرنا انه البنت الستايل الكشخه اهيا اللي مو متحجبة ،الناس لي يبون يمدحون وحده يقولون شحلوها ستايل مو متحجبة ، ابي اعرف ليش صارت نظرة الناس حق الشي الصح انه هلاقة .يمكن تقولون لي انتي ما عليج من الناس اهم شي كلام ربج سبحانه و تعالى ، انا ادري بالشي هذا و انا تحجبت من نفسي بس ما انكر انه يتني اوقات تمنيت اني اكون مو متحجبة استغفر الله ،ادري ابليس بيلعب لعب على هالسالفه براسي بس الله يعين
و استغرب من الأمهات اللي يقولون ما نحب الحجاب !!!!بس صراحه صج صج صج جهاد الوضع و مرات اوصل مرحله تعب لما اطلع مع ج و اشوف صراحه البنات مع نفانيفهم يهبلون و الله فما الومه لو شاف او طالع ،انا ترى مو من النوع اللي اطالعه شنو يشوف و منو يطالع .الحين الشي اللي ابي اعرفه حجاب بو مترين ورا هذا متى راح يروح ؟؟؟ يعني بس ملينا كل ماله و يكبر و يزيد بالنمو بالطول و العرض الى متى ؟؟؟؟؟؟؟
الظاهر ازمة الحجاب متفشية بين الكل من مجلس الأمه الى الهنود اللي يشتغلون بالجمعيات :)روحوا جمعية مشرف و شوفوا الهندية اللي تبيع البطاطة المشويه عند الباب حجابها كبير :)
الله يعيني و يعين جميع ننساء المسلمين على هالجهاد
By the way am an addict to Wii :) it`s so fun i am playing Wii fit everyday hoping to loose some waight :) enshalah

18 comments:

مركبنا said...

اي والله تستغربين

مروا علي ناس يناشبوني بحجابي حرام عليج قطية هوهو هو هو بعد

الله يثبتنا عليه ويقوينا

كفاية عزة ان جسمج وشعرج مو حق كل ريال والساط والاقط

تصدقين وايد اقعد بكاريبوا الصالحية

خصوصا الصبح يم الدريشة

تشوفين البنات لما يمرون واهم مو متحجبين وطالعين نظرة الهندي الى قاعد ينظف شلون يطالعهم ويشقهم شق

تقولين حق نفسج الحمد لله يارب انك اغليتني وحفظتني

حافظج الرحمان

bader said...

هذا جانب من الاعجاز العلمي في السنه النبوية

الرسول صلى الله عليه وسلم قال ان في اخر الزمان ستظهر اسنمة البخت

انا اعتبر هالشيء معجزه ... ان الرسول صلى الله عليه وسلم يخبر بشي عن المستقبل
-------

" وَلْيَضْرِبْنَ بِخُمُرِهِنَّ عَلَى جُيُوبِهِنَّ"
وهي ايه تخاطب المؤمنات ... فهل ستخرج اخرى وتقول : ان هذه الايه تخص فقط المؤمنات وليس باقي النساء ؟

Nikon 8 said...

علمينا أكثر عن الوي
:)

Ducati said...

Hi

I think ena ely tby talbes 7jab ya
Enha talbesa 3adel aw la tlabsa
Ma adry laish bnatna '3a9eb yaboon
Yetfantkoon eb every thing they have

Sn3a said...

الحجاب فرض
سواء هالشي عجبنا ولا ماعجبنا

لكن حجاب بعض البنات فلم
لكن هل هالشي يخلينا نكره او نحب الحجاب؟
انا ماشوف اي علاقه بين لبس الهيلقيات للحجاب وبين اقتناعنا فيه كفرض
ولا اشوف اي علاقه تربط ارتفاع الحجاب بنظره الناس (للحجاب) الصجي

اللي مو عاجبها لاتحجب
لانها ان تحجبت بتصير نفس اللي تعيب عليهم


انا وحده ماكنت اواطن الحجاب
مو كحجاب
بس من كثره حنه الناس تحجبي وفرضا متي وانتي صغيره
تحجبت لما الكل سكت
هل معناته اني اقتنعت؟
انا اقتنعت ولا لا هالشي ماراح يجدم ولا يأخر
لان مو شرط اقتنع بالصلاة او بالزكاه او بالحج
الفرض مافيه اقتناع

صح الواحد يحب يلبس يحب النفانيف يحب الشعر يحب الصبغات
احنا بشر والبشر يحبون كل شي حلو ومغري وهذي الصراحه
لكن الدنيا كلها جهاد للنفس
يعني انا مثلا ودي بيوم اروح اقعد عالبحر الفير بروحي
هل اقدر؟
لا عاداتنا وتقاليدنا تفرض اني كبنت عيب اكون بره هالحزه بروحي
شرط اقتنع بالعادات والتقاليد؟

انا ادري ان ردي طويل
بس صدقيني لانعطي للناس اعذار اللي بيتحجب الشيلات تينن ماكو مثلها وكلمن يعرف يلبس ويتستر
واللي مايبي باجر ربي يحاسبه ويحاسبنا لان اكيد هم احنا لبسنا مو مستر بشكل كامل مثل ما اهو المفروض


لايضيق خلقج واحسنلج انج مارديتي

Delly said...

ana agool hathi 3alamat ilsa3a!

Ra-1 said...

الله يثبتنا :)

حجاب بو تفخة صج لي متى
ذاك اليوم وحدة يمي بالطيارة لما طارت الطيارة ارفعت حجابها وطلعت الوردة العملاقة الي كانت تافخة فيها الحجاب عشان تقدر تتسند هاههها
ولما هبطنا دخلتها بحجابها
:p مت من الضحك

joy said...

حمدالله عالسلامة اولا
وثانيا كان الحجاب ستر
الحين الحجاب ساتر
يعني حجاب ونص القذلة طالعة
واللفة تشف
ولابسة ليقينق
وبلوزة قصيرة و
الوان فاقعة
هدووم ضيجة

يا ساتر
ما اقووول اللا يامثبت القلووب ثبت قلووبنا على دينك يارب

وماعليج من كلام الناس السنع سنع
وج مايهمه اللي بره اهو مرتاح انه مرته خاشة شي محد بشوفه غيره

الله يهنيكم ببعض ومايشووف غيرج مره

مشكلة التكاثر الغير سليم
الله يستر على هالديرة
ياحلات الحجاب الذرب
شوفي الخليجيات بالسفر ايشوقونج والكويتية اتصيدينها من بكلتها والقفة اللي وراها ومكياجها والالوان والفناتق اللي تتميز فيها هلاقتهم

ياساتر

joy said...

اي تعالي شلوون الوييي؟؟
فيت واللا يوجا اتحسين مفيد او اوكي يعني يسوى اقط المدربة بظهري واشتري وي؟؟

Anonymous said...

السلام عليكم

تعوذي من ابليس أول شي
ثاني شي سوء، استعمال الحجاب من بعض الفتيات مو معناته إن ردت فعلك تكون سلبية على الحجاب

أنا شاب عمري 22 سنة واسمحيلي إني أكون جريء شوي

البنت الغير متحجبة تلفت وتجذب بالنظر بس لا أكثر ولا أقل خصوصا إنهم يعتبرون الأقلية بين الكويتيات فمو معناته النظر لها اعجاب بشكلها وجمالها. وعلشان جذي الله سبحانه وتعالى فرض الحجاب لحماية وحفظ كرامة المرأة

لو سألتي كل شباب الكويت اللي أنا منهم راح تلقبن أكثر من 80 أو 85 بالمية ما يرضون يتزوجون الا المتحجبة

الجمال والكشخة ما لهم شغل بالحجاب أو غير الحجاب، مثل الاخلاق ما لها شغل بالمتحجبة أو غير المتحجبة

يمكن إنتي المجتمع اللي تختلطين فيه سواء الأهل أو الصديقات أو زميلات العمل مجتمع متحرر يشجع على عدم ارتداء الحجاب

في مجموعة كبيرة من المجتمع الكويتي واهي الأكبر تنظر إلى غير المتحجبة على إنها اهيا الغريبة على المجتمع، فالأمر يختلف على حسب الطبقة من المجتمع

للأسف في مجموعة من المجتمع تنظر على إن سفور المرأة جزء من التطور والانفتاح ودليل على الرقي المالي والفكري والاجتماعي وهذا اكيد مو مقياس

Ms Loala said...

Allah yesame7 b3th el banat hal ayam, shaweho som3at el 7jab :\

ميره من دبي said...

لا اتخليين الشيطان ايقص عليج.
تقدرين اتكونيين ستايل و كشخه و امحجبه.
مادري يمكن انا اسهالي اقول جي الانه المجتمع اللي انا في متحجبين او يلبسون الشيله.

Яeema said...

والله عندنا بنات شحلوهم هابين بحجابات من جمعيه الفيحا بو دينار و نص
و أمطات الوان بس الألوان الحلوة اللي حدها كلاس

و اللبس يشوق اللي أنا مو متحجبه كل ساعه أسألهم من وين لبسكم و حجاباتكم

يا حلو البساطه
و يا حلوهم اللي عندنا كلاس
لا ضيج
و اللبس صج مال متحجبات مستر ويزوقون القلب

و الميكاب اللي ما يبين انها حاطه شي


فلا تقوليلي متحجبات
على الوحده ونزاكتها


ياما مو متحجبات يفشلون و أوفر
و ياما بنات متحجبات و يخلون المجمع كل واقف على ريل وحده

أصلا كونج متحجبه فهذا فخر
ياليتني أقدر و أتخذ هالقرار
راح أكون أسعد وحده بهالدنيا

الله يثبتج عليه
و يا بخت عينج في بعد

انونيمس بالعربي said...

انا مثلج

اهنيج على هالشجاعة اللي عندج .. انا متضايقة من الحجاب وساكتة واحس ان الحجاب منتقص من شي فيني استغفر الله. ودي اطلع من بيتنا بشعري مثل ماهو واقول حق الدنيا ترى هذي انا الصجية ..ترى انتي صاجة انا بعد احس ان الناس عندنا يقسمون البنات الى متحجبة ومو متحجبة وهالشي مضايقني وايد
بس بالاساس اعتقد انها تهيؤات وفكرة ان الحجاب مو ستايلش بيدنا احنا ان نغيرها

الله يعيننا بس ترى صج جهاد

بو سعد said...

الامور ترجع لاسبابها

ليش البنت تلبس الحجاب ؟

اللي لابسة الحجاب مغصوبة او اتباع عادة هذي تبيه كشخة

و اللي لابسة الحجاب تبي تطبق فريضة فرضها رب العالمين و تبي الجنة من وراها .. راح تدور حجاب امهات المؤمنين و تلبسه ولا يهمها كلام الناس و لا هوى نفسها

الدنيا دار ممر .. و الآخرة دار مقر

vyyvaa said...

gowwa and welcomeback from london. its on my visit list this year.. and definitely hajar should join :D

as to the hijab.. alot of girls know how to wear it, and some really make it look so attractive, others just wear it , and others.. they wish to take it off.. ya3ni we are a mix really lol. i am not good wearing hejab, not the girl u would call stylish hehe.. just black and go.
i was thinking of buying a wii fit!! tell me do u buy separate games or everything in there? tell us more about ur experience..

Ansam said...

By the way... I would say el 7ejaab mo bas shaila wala gha6a raas :-) el 7jaab more than that..

Ļa ƒéммé said...

يا بختج بحجابج الله يرزقنا اللهم آمين
ومثل مافي بنات كيوت وحلوين مو متحجبات في متحجبات بعد وملفتين أكثر بعد واستايلهم مميز وراقي
الله يثبتج ويرزقنا اللهم آمين يارب