Monday, January 26, 2009

الحب الجديد

صاير لي فتره مادري شكتب دايما اكتب بوست و بعدين امسحه


امي الحبيبة باقيلها اسبوع و تسافر و ترجع حق البابا اللي مو راضي ايي الكويت :) حبيبي ولهانة عليه حدي بس عليه بالعافية خل يستانس الحبيب سافر من القاهره لي شرم الشيخ و مستانس هناك :) جان زين انا معاه خل يظبطني


وايد عندي شغل بالدوام و قاعدين نجهز حق مؤتمر و انا ماسكة اللجنه الإعلامية ، الله يهديها مسؤلتي عطنتني هالشغله و احس صايره وايد حساسه و لويه وصاير علي ضغط ، بس ادري فيها ما قصرت تبيني اتميز و امسك شغل مهم ،يا ربي تينن هالإنسانه الصراحة اول مره اشوف وحده تحب تبرز موظفينها الحمدالله و الله انها مسؤلتي


انا مو عنصريه بس المؤتمر ماسكينه غير كويتين و متبعين المثل "مال عمك لا يهمك " و انا الصراحه ما اقدر يا ربي قلبي على فلوس ديرتي تقطط مني مناك :(بس شسوي الله يعيني اني اقدر اسوي شي


------------------------------------------------------------------------------------------------


احببتها

منذ النظره الأولى

منذ لقائنا الأول أغرقتني بحبها

فهي انيقة ،راقيه ،هادئة

ابتسامتها لا تفارقها

علاقتي بها لم تتجاوز الشهر

و في كل خطوة معها تزيدني حبا

علاقتي معها منذ البداية مليئة بالفرح

و لكن الطمع يملؤ قلبي

فانا اريد المزيد و انا بانتظار المزيد انشالله

قبل فراقنا

احبيني ، اعطيني ،امليئني بلأفراح

فلقد احببتك منذ البداية

يا 2009







السنة اللي طافت سمعت وايد اخبار طلاق و فراق و جم خطبه انفلت ووايد ناس يحبون بعض هدوا بعض

و مشالله السنة من بدايتها اكثر من 5 خطبات يا رب يتمم عليهم و يوفقهم يا رب

ووايد متفائله ب2009

الحمدالله


انا دايما اتخيل السنين على اشكال و الشهور الوان ف مادري هذا شي طبيعي او لأ !!عشان جذي 2009 تخيلتها نفس الصوره و تعيت وايد عشان القى صوره نفس اللي فبالي :)

4 comments:

Ra-1 said...

آنا بعد متفاءلة من 2009
وصج من بدايتها حلوة :)
الله يديم السعادة والأفراح على الجميع

esTeKaNa said...

صباح الخير
:)
يعطيج العافيه يارب
ان شاء الله يكون المؤتمر حلو وتنجزين
وايد حبيت روح الوطنية فيج
!!
فعلا ديرتنا قاضبينها غيرنا
وما يهمهم شي
انا بعد قاعده قاعده على السالفه
فزين تسوين
:)

وانا متفائله بهالسنة
ويارب تكون خير علينا كلنا

Scorpion said...

الله يعطيج العافية و ترى كلنا حايشتنا موجة كسل و خمول وو مو صايرين مثل أول مادري اشفينا قبل اشزينا جيل كامل انعرف بعض الحين الحياة تغيرت مادري احنا تغيرنا

على فكرة وايد عجبني اسم المدونة بس حسافة ما لقيت مواضيع عن هالموضوع الحياة بعد الزواج

شكرا:)

New Bride said...

ra1 : انشالله يا رب تكون سنة خير علينا كلنا

estekana : صباح النور مشكوره على التشجيع و انشالله اقدر اسوي اللي يرضي ربي و يرضي ضميري و الله قاعده لهم قعده لوووول احس لاعت جبدهم مني

Scorpion : اي و الله الكسل مقطع :) بس الحمدالله لازم نمشي مع هالدنيا
و بالنسبة حق اسم مدونتي انا اول ما بديت كان الهدف اني اقدر افضفض على راحتي و اكتب اللي بقلبي عن الحياة اليديده اللي دشيت لها بس و الله حاشتني تعليقات مو حلوه مادري خلتني افكر وايد قبل لا اكتب :)