شنسوي يعني ؟؟؟؟
ابي اتحلطم اليوم مادري شفيني احس صايره مملة
واي ليش جذي احنا بالكويت عايشين بمجتمع مظاهر
و هالشي يتعب و الله و ما اقدر اقول اني مالي شغل بالناس لأني مو عايشة بروحي لازم اجاري
بس ادري انه كل هذا على حساب نفسي
اللبس و الجناط و الستايل الناس قامت تقييم الشخص على شكله وستايله
و اذا كانت الوحده متزوجه بعد يشوفون ريلها شسوالها و شنو شرالها
انتو شكو و الله
يعني لما وحده تنصدم و تقول امبيه اسافر مع ريلي و ادفع انا ؟؟؟
احرجت البنت اللي قالت السالفة
ووحده قالت انه تدفع معاش خدامتها الثالثة يعني ريلها يدفع ثنتين قامت هالبنت تقولها شلون و شكو انتي تدفعين
لا تحرجينها يعني
و سوالف وايد تخليج تفكرين و تحاتين و تعيشين بقلق و هالشي يتعب
اكد الوحده ودها انها تعيش بدون ما تصرف شي خاصه اذا متزوجه بس مو كلنا متزوجين مليونيرية
و التفلسف اللي ماله داعي لما تييج وحده و تقول ريلي بعيد زواجنا شرالي جنطة و الله مو وايد غالية ب 1000
عليج بالعافية بس لا تتفلسفين
حسبي حساب انه بمكن تكون وحده معاج بالقعده مو متزوجه او منفصله او ريلها ما يقدر
ويع احس صايره عيوز حنانه مادري شفيني بسم الله
بس و الله احس سخافه
لو بيدي و الله اهاجر
كنت اتمنى اني اعيش بره الكويت و الله
ودي اسافر احس يبيلي سفره بس ابي سفره طويله مثل ما كنت اسافر مع اهلي مادري عن شي و ما التزم بشي و ما احاتي مصرف
و ما احاتي الدوام
بس كل هذي ايام و راحت
i guess i am PMSing that`s why i am in bad mood
shay barrah elmawthoo3 :
انا حدي وطنيه و الكل يدري
بس ذاك اليوم حلمت حلم غريب
حلمت ب صدام !!!!!
شكو صدام ؟؟؟ شكو احلم فيه
و كان بالحلم شكله وايد غير جنه عمره 35 و ابيض حده وويه غير صاير شكله جنه كمال الشناوي ايام قبل
استغفر الله قمت من النوم افكر هل ممكن انه صدام يدخل الجنه ؟؟؟ الله و اعلم الواحد ما يدري
خير انشالله